Ko Mynsiem Jong Nga, To Kyrkhu Ïa U Trai

Kat ba nga dang khmih ïa ka jinglong briew, basdang naduh ka jinglong khynnah, ka long kaba suk ban ïohi ba iwei pa iwei na ngi, ngi don ïa ka jinglong bapher bapher. Hynrei ka don kawei ka jinglong kaba ngi baroh ngi ïa long lang kumjuh, bad kata ka long ka jinglong ba la hap. Kumno re kumno nga ïohi ïa kane haba nga peit kumno ba i khun bad pyrsa jong nga ki snoh ha nga haba nga don ei ei ba ma ki ki sgnewtynnad. Kaba marpyrshah ka long haba ki tip ba ngam don ei ei ba itynnad ban ai ïa ki. Kim i salia bad i patiaw ban wan bad ban shah shkor ïa nga. Kane kan ym lah ban long lut ha baroh ki khynnah. Hynrei, ban shu kren kyllum, ki khynnah rit ki don ïa ka jinglong ba khwan tang ïa lade.

Ma ngi ki ba la heh la san ruh ngi don ïa kane ka juh ka jinglong. Hynrei ka pynpaw ïa lade ha ki rukom bapher. Ngi kham noh sha kita kiba leh bha ïa ngi bad sha kita kiba ai jingmyntoi ïa ngi. Hynrei ngim ju patiaw ïa kito kiba long ka jingkyrkhu ïa ngi ha ka liang kaba kynja mynsiem. Ki don kito ki bym lah ban ïarap ïa ngi ha kaba ïa dei bad ki jingdon jingem, hynrei kiba ïarap ïa ngi lyngba ki jingdwai bad ka jingshah jingit bad kiwei kiwei de kiba kum kine. Ki don ki briew kiba da don ka mynsiem bakhia bha shaphang ka jingkoit jingkhiah bakynja mynsiem jong ngi bad ki da kwah shisha ba ngin long kiba la pynim bad kiba ïoh pateng ïa ka Hima U Blei.

Ki don pat ki briew kiba sngewnguh ïa la ki kmie ki kpa, ki baha ïing bahasem bad ki lok ki jor lada ki ïoh na ki ki jingmyntoi ha ka spah ka phew. Kane ka long ka jinglong bakhwan jong u briew. Wat la ngi klet noh ïa ki jingkyrkhu bakynja mynsiem ba ki kmie ki kpa, ki bahaïing bahasem bad ki lok ki jor ki ai ha ngi bad ngi pynshong nongrim ïa ka jingieit jong ngi ïa ki tang halor kita kiei kiei kiba ngi lah ban ïohi da la ki khmat bad ktah da la ki kti, ki don ki kmie ki kpa kibym kloi ban duh jingkyrmen ïa la ki khun. Kane ka jinglong ka don ruh ha U Blei. Hato ngi ainguh ïa U Blei tang namar ba U theh ïa ki jingkyrkhu jong U ha ngi ne, tang namar ki kambah ba urlong ha ka jingim jong ngi? Ha ka por ba U dang don ha kane ka pyrthei kum U briew, U Jisu U ong ha ngi ha Mathaios 5:44-45, “Hynrei nga ong ha phi, To ieit ïa la ki nongshun jong phi, bad to kyrkhu ïa kiba tim ïa phi, to lehbha ïa kiba shun ïa phi, to duwai ruh na ka bynta kiba leh sniew ïa phi, bad leh beiñ ruh ïa phi: ba phin ïoh long ki khun U Kpa jong phi uba ha bneng: naba u pynmih ïa ka sngi jong u ha kiba sniew bad ha kiba bha, u phah ruh ïa u slap ha kiba hok bad ha kibym hok.”

Katno long ka jingsngewtynnad ki kyntien jong U Nongpynim! Ngi lah ban ïohi katno U Blei U long Uba ieit wat la u briew u long uba khwan bad uba brai. U Blei Um shym la khang ïa ka kti jong U ban phah ïa U Kpu ka bneng, U Khun ba la kha marwei. (Ïoannis 6:35, Ïoannis 3:16, 1 Ïoannis 4:10). Kane ka long ka jingieit bajanai jong U Blei ïa u kynja bynriew.

Hynrei ma ngi kiba kam ba long ki Khristan, ki nongbud jong Ka Lynti, ngi klet ban ainguh ïa U Blei man la ka sngi na ka bynta ka jingai sngewbha bakordor tam ba U la ai ïa ki briew baroh. Bunsien ngi phla ïa U Blei haba ïa ngi la kyrkhu da ka kam babha, ka ïing, ka jingim babha, ka longïing bad kumta ter ter. Hynrei ngim lah ban leh ïa kajuh kaei kaei haba ngi poi ha ka khep baeh. Ngi donkam ban kyndit na kaba thiah, ym tang ban ainguh ïa U Blei na ka bynta ki jingkyrkhu bakynja doh ba ngi ïoh hynrei na ka bynta ki jingkyrkhu bakynja mynsiem ruh kumjuh. U Khrist U ong, “Naba me la ïohi ïa nga, ko Thomas, me la ngeit? Suk te kita kibym shym la ïohi, bad kiba ngeit pynban.” (Ïoannis 20:29)

Da shisha, ka jingngiet ka long ka jingngeit ha kiei kiei kiba ngim pat shym la ïohi hynrei ngi dang ïai ngeit bad ïai kyrmen. Namar kata, to ngin ïa aiti ïa la ki jingim sha U Khrist khnang ba U lah ban im hapoh jong ngi (Galatia 4:6) khnang ba ngi lah ban kyang sha U Blei da ka jingainguh ba shisha ïa U Kpa. Ïa ngin ïa ainguh ïa U Blei badonbor tam ba U la ai ha ngi ïa U Khrist, U Khun jong U, ym tang ban siewspah ïa ngi hynrei ban pynlong ruh ïa ngi ki khun shynrang bad kynthei jong U. (Ïoannis 1:12). Lada ki sim ki lah ban rwai ïaroh ïa U Blei bad ki syntiew ki skud ki phuh bad pynpaw ïa ka jingitynnad jong U Nongthaw Badonbor tam, te katno tam lei ma ngi ba la thaw ha ka dur jong U hi? (Jenesis 1:27). To ai ba U Mynsiem U Blei Un ïalam ïa ngi khnang ba ngi lah ban pyndem rit ïa lade hapoh ka mon jong U Blei bad to ïa ngin ïa ainguh ïa U Blei ba U la ai ha ngi ïa ka jingjop halor ka pop ha U Khrist. Ïa ngin ïa ainguh ïa U Blei ïa ki jingkyrkhu ba U theh; U Blei U long Uba bitdor ban ïoh ïa ka burom bad ka jingïaroh bad U long ruh Uba bitdor ban ïoh ïa ki jingainguh jong ngi ha man la ka khyllipmat ka jingim jong ngi.

To ai ba ki kyntien jong U Dabid kin don ha ki shyntur jong ngi lem bad ka jingkmen bad ka jingshad kmen, bad da kaba ong, “Ko mynsiem jong nga, to kyrkhu ïa U Trai; bad baroh kaba ha nga, ïa ka kyrteng bakhuid jong u. Ko mynsiem jong nga, to kyrkhu ïa U Trai, bad wat klet ïa ki jingleh babha jong u baroh, uba map ïa ki jingleh bymman jong pha baroh, uba shna ïa ki jinpang jong pha baroh.” Ki Salm 103:1-3.

*******