Ka Jingpeit Biang Ïa U 2018

Ka la dei ka jingsdang jong uwei pat u snem bad ka ju long ka jingmlien ba haba ngi peit ïa kaei kaba u snem barim u la don ban ai ha ngi, ngi kwah tip kaei kaba ap ïa ngi ha une u snem. Watla ngin sa tip ïa kane, nga thikna ba ma phi baroh phin mynjur ba u snem 2018 u long u snem ba bun ki jingjia ba la jia bad ngi la sakhi ïa ki dak ba ngi la nang kham jan sha ka jingwan arsien U Khrist. Ka pyrthei ka la long kum ka jingïakleh jong ki mar ba kloi ban kem ding bad ka donkam tang ïa iwei i phngait ding ban pynpluh ïa ka.

Ha u 2018 la don bun ki jingïakhih ha kaba ïadei bad ka imlang ka sahlang, ka synshar ka khadar bad ka ïoh ka kot. Kito na phi kiba peit bad sharai, phin ithuh ba kiei kiei baroh ki long kulmar lut. Ka jingïania halor mano ba dei hok ban kam ïa ki dewlynnong rit hapdeng ka duriaw, ka jingkynnoh balamler ba ka bor sorkar ka pyïap ïa la ki briew jong ka, ka jingleh kaba la plan lypa ban pynmih ïa ki jingkynad kiba ïadei bad ka jingpyndonkam laitluid jong ki lieng ïa ka lynti bakhim ha ka duriaw kaba pynïasoh ïa ka Black Sea bad ka Sea of Azov, kano ka pisa ban pyndonkam ha ka jingïadie-ïathied ïa ka umphñiang ha ka hat jong ka pyrthei salonsar bad babyllai ki jingïakajia hapdeng ki nongsynshar ri kiba bun na ngi ngim lah ban bud dien ne ban kynmaw ruh, ki khring ïa kane ka pyrthei baroh kawei kham jan bad kham jan sha ka thma kaban jia hajan baroh kawei ka pyrthei.

Ka jingbuh jingeh ha kaba ïadei bad ka khaïi ka pateng hapdeng ka USA bad ka China, kaba dang ïai bteng haduh mynta myne, ka kylla long ka jingma ïa ka koit ka khiah jong ka ïoh ka kot jong kiwei kiwei ki ri. Kum ka nuksa barit, ngi la ïohi kumno ba ka jingkhyllem jong ka Bombay Stock Exchange kaba la neh katto katne sngi lynter ne da ki taïew, wat da ka la neh tang shipor, ka la pynkhuslai ïa kito kiba plie ïa la ki khmat bad ki shkor jong ki. Ka Venezuela ruh ka don hapoh ka jingïaleh bakhraw ha kaba ïadei bad ka ïoh ka kot kaba la pynhiar ïa ka jinglong jingman jong ka rukom im ha kato ka ri. Ka ri Ïurop ruh ka don la ki jong hi ki jingeh ha kaba ïadei bad kane ka bynta.

Ki jingeh kiba la mih na ka jingphetwir jong ki briew sha ki ryngkew jong ka Ïurop kaba shaphang sepngi, bad ka jingkhot kyrpad jong ka Germay bad ka France ïa kiwei pat ki ri ha ka European Union ban plie ïa ki khappud jong ki ban shah ïa kine ki nongphetwir ban ïoh jaka sah ha ki shnong jong ki, ka la pynmih sa ïa ka jingïakren pyrshah hapdeng ki nong shong shnong jong ka ri Ïurop bapher bapher. Ki jingdawa jong ki populist ban buh ïa ki kyndon treikam ban pynmyntoi ïa ki dohlieh bad ki trai shnong jong ka bad ka jingpynkhie im biang ïa ka jingkren pyrshah ïa ka jaitbynriew Jiw ka la nang san ha ka jingpawnam jong ka katba dang ïaid ki sngi bad ka dang ïai bteng haduh kane ka por. Bad ngim dei ban klet ruh ïa ka jingjia kaba kongsan ha une u snem 2018 shapang ka jingkren jong ki nongphetwir kiba kren pyntriem ba kin rung jubor sha ka ri USA.

Katto katne por, ma ngi hangne ha Shillong, ngi la sakhi ïa ka jingkylla ha ka rukom long jong ka pyrthei ban noh mynsiem sha ka liang jong ki paid LGBT kaba la saiñ dur ha kiwei kiwei pat ki ri, khamtam eh ka ri Sepngi. Bad ngi la ïohi ruh ba kane ka jinglong ka la sdang ban wan hiar sha kane ka ri jong ngi ruh bad ka la don ka jingkhuslai, ha ka liang jong nga, ba ki briew kiba bat ïa ki kyrdan jong ka jingkitkhlieh jong ka ri kin sa pynmih ïa ki aiñ kiban ïahap sur bad ki jingdawa jong kine ki paid LGBT. Bad ka la long kumta, ba ha u 6 tarik U Nailur, 2018, ka Supreme Court jong ka India ka la pynkylla katto katne ki aiñ kiba hap hapoh ka Section 377 jong ka Indian Penal Court da kaba pynlong aiñ ïa ka jingïashong para shynrang bad para kynthei. Watla ka jingshongkurim hapdeng kine ka dang long beaiñ, nga tip ba kan ym slem ba kane ruh kan sa urlong.

Nga tip ba dang don byllai ki jingjia ba la jia ha u snem ba la lah hynrei ka por bad ka jaka kam shah ba ngan wanrah kita baroh hangne. Hynrei nga tip ba kiei kiei baroh ki don ha ka jinglong bakulmar. Hynrei ka jingkylli ka long: Kaei kaba ngi dei ban khmih lynti ba ïohi ha une u snem? Ban shu kren hok, ka lawei ka long kaba dum. Ma nga hi shimet, ngan ym sngewlyngngoh ban ïohi ïa ka jingsdang jong kawei pat ka thma bah. Ngan ym long uba sngewlyng-ngoh lada kan jia ka jinghiar ha ka ïoh ka kot kaba shyrkei kaban jia hadien katto katne. Bad ngi dei ruh ban khmih lynti ïa ka jingkiew jong ka jingïamynsaw bad jingumsnam kaba ïadei bad ki jaitbynreiw bapher bapher, khamtam eh ha kito ki ri kiba mad ïa ki jingeh kiba ïadei bad ki nongphetwir. Ngi im ha ka ïa jong ka histori jong ka pyrthei baring ïa ka jingut jingpyrkhat jong ngi bad babun ki angnud ban tip kaei ban jia hadien nangne. Hynrei kam donkam ba ngin sheptieng. Lada kine ki jingjia kin wanrah ïa ka jingkyrmen ha ngi ka dei namar ba da kine kiei kiei ngi tip ba ka jingkut ka la hajan. U Jisu hi da lade U ong, “Naba kadei ba kine kiei kiei baroh kin long; hynrei kaba kut kam pat la jia.” “Haba phin ïohi ïa kine kiei kiei baroh, to tip ba ka long hajan, ha ki jingkhang.” (Mathaios 24:6,33). Ki jingjia ki pynthikna bad ki nang ïai pynthikna ba ki rukom jong u ksuid kim lah ban pynmih ïa kaei kaei ruh kaba janai bad ka por kan wan ba U Khrist Un ïoh ïa ka bor bapura halor ka pyrthei. Kane ka dei ban long kum ka jingpynkynmaw ba katno tam ba ngi dei ban snoh ha U Khrist ha Uba ngi long kiba dap pura.

Haba ngi phai pat ïa ki khmat jong ngi sha ka OTG (One True God) movement, ka long kaei kaei kaba sngewsih shisha ban ïohi ba ki don katto katne kiba kwah ban leh donbor halor ki ministry bad ki kynhun ba don hapoh jong ka. Ki khmih lynti ban pynurlong ïa kane da kaba seng ïa ka seng kaba don lem bad ka ïa ki rukom pynïaid kam kiba ïasyriem bad ka General Conference jong ka Seventh-Day Adventist. Kaei kaba phi lah ban khmih lynti na kane, lada ka long kam, ka long ba ka pisa ka pilaiñ ha ka movement baroh kawei kan don hapoh ka jingpynïaid jong tang ki katto katne ngut ki briew, bad kine ruh kin rai mano batbit ban long u nongtrei mission bad hangno, bad katno yn siew tulop ïa ki nongtrei bad kumta ter ter. Kine kiba kyrshan bad kiba kwah ban pyntrei kam ïa kane, ki long kito kiba kyntait ïa ka khubor ka hok da ka jingngeit. Namar ba kiba bun ki kyrshan ïa kane ka jingthmu, kito ki kynhun bad ki ministry, kum ka jong ngi, kibym kwah ban don hapoh kane ka seng kin sa kynduh bun ki jingeh bad ka kam ïalap jong ngi ruh yn sa shah pynthut. Kam ym slem shuh ba ngin ym shah kynthup lang ne shah ithuh kum kita kiba long shibynta bad ka OTG movement. Hynrei ka long ka jingshadkmen ba watla hapdeng bun ki jingeh, ngi ïai jam shakhmat ha ka jingpyrshang jong ngi ban saphriang ïa ka khubor jong ka jingpynim bad nga ngeit, ba lyngba ka jingtrei shitom jong ki nongsharai baïaineh ha ka pyrthei baroh kawei, bun ki la poi ban tip shaphang ka jingshisha kaba kdew sha U Khrist kum ka lynti sha ka jingpynim.

Ka Christ In You Ministriew pat ha kawei ka liang, ka dang ïai pynleh jingmut ha ka kam jong ka jingsaphriang ïa ka khubor babha sha ki kiwei kiwei ki jaka jong ka ri Khasi bad Jaiñtia. Ngi kyrmen ba shen ngin sa ïoh ban ïalap ïa ka jaitbynriew Garo ruh hangne ha jylla Meghalaya. Ngi dang ïoh ruh ïa ki jingkyrpad jong ki katto katne ki briew kiba thrang ban ïa kynduh bad ngi bad ki kyrmen ban ïoh ïakren bad ngi halor ka mat jong ka jinglong Blei bad kiwei kiwei ki mat kiba ïadei bad kane. Ngi kyrpad ba phin sngewbha buh lem ïa ngi bad kine ki briew ha ka jingdwai jong phi.

Ngi sngewkmen ruh ba ngi la ïoh ka lad ban pynlong ïa ka taïew jingdwai ha u bnai Risaw bad ngi kyrmen ba ngin dang ïoh shuh ka lad ban pynlong ïa kiwei pat ki jingïaseng kyrpang ha ka lawei. Ngi sngewtynnad ruh ba U Blei U la jubab ïa ki jingdwai jong ngi da kaba pynïoh ïa ngi ïa ka camera kaba ngi la pyrkhat ha mynnyngkong ba kan slem bha shuwa ba ngin ïoh ïa ka, namar ka jingeh ba ngi ïashem ha ka liang ka pisa pilaiñ na kawei ka por sha kawei pat. Ngi la lah ban thep ïa ki video jong ngi ha YouTube Channel jong ngi. Haduh mynta, baroh ki video ki dei ha ka ktien Khasi. Shen, ngin sa thep ïa ki video kiba dei ha ka Phareng kiba ngin sa pynkhreh ïa kito kiba kren bad kiba kham noh sha kane ka kyntien bad khamtam eh haba ngi buh jingmut ban ïoh ktah lem ïa kito kibym kren ïa ka ktien Khasi kiba shong basah ha kane ka bynta jong ka ri.

Ngi shim ruh ïa kane ka lad ban ai khublei ïa ki dkhot jong ka kynhun jong ngi ba ki la ai sngewbha ïa ki jingkynshew jong ki sha ka Christ In You Ministries kaba la pynlah ïa ngi ban thied ïa ka Canon ink tank printer. Ka jingnoh sngewbha jong phi ka la pynlah ïa ngi ban pynmih ïa kane ka newletter kaba phi dang pule mynta.

Watla ngi la ïaid lyngba bun ki jingeh ha kane ka snem ba la lah, to ngin ïa pynkynmaw ïa lade ruh ïa ki jingïashem basngewtynnad bad ki kabu ksiar kiba ngi la ïashem. Ngim don ei ei lait noh tang ka jingainguh ïa U Blei na ka bynta ka jingisnei badapbaing ka jong U. To ngin ïakhmih ïa ka lawei da ka jingkyrmen bad ka jingangnud ba, hapdeng bun ki jingeh ba ki para briew ki buh ban leh pyrshah ïa ka kam jong ngi, U Blei Un prat lynti ïa ngi ban saphriang ïa ka ktien jong U sha kita kiba shem lanot bad kita kibym ïoh ïa ka jingïarap bakynja Blei. U Blei Un kyrkhu ïa phi lang baroh bad to phin don ka snem kaba dap da ka jingkykhu.

*******