Ka Jingsuk Bajanai

Haba ka jingim jong ngi ka pait ka pra; haba dohnud ka sngewsih kthang; haba ka lynti ka khim; haba jingim ka shoh tlot; haba ngi pynshah sa shiliang ka ngab bad ngim lah kren bad pyrkhat ïa ki jingsngewsih kiba ngi la leh bad shah leh; haba jingshai ka i dum, bad ka dohnud ka pait ka pra kum ki jaiñ lyngkhot kiba la shah tar; bad haba ha pyrthei ym ïoh jingsuk mynsiem, don tang kawei ka lynti bad kata ka long U Khrist keiñ. Hooid, shisha ym don uba lah ban sngewthuh ïa ngi lait noh tang Uta Uba thaw ïa ngi bad Uba long “U Nongpynlong bad u Nongpynjanai ïa ka jingngeit ka jong ngi.” (Hebru 12:2). U Trai Jisu U ong, “Nga kren ïa kine kiei kiei haphi, ba phin don ka jingsuk ha nga. Ha kata ka pyrthei phin ïoh ka jynjar: hynrei to long shlur phi! Nga nga la jop ïa kata ka pyrthei.” “Ïa ka jingsuk nga iehnoh ha phi, ïa ka jingsuk ka jong nga nga ai ha phi, ym kumba kata ka pyrthei ka ai, nga ai ma nga ha phi. Wat khih kuslai na ka dohnud jong phi, lymne wat sheptieng.” (Ïoannis 16:33; 14:27)

Ki kyntien U Trai, da shisha, ki ai jingtngen ïa ngi. Da lei lei ruh u briew hi um lah ban ai ka jingpyntngen mynsiem kumba U ai U Khrist. Ki don kiei kiei kiba ha ka jingim jong ngi yn ym don mano mano ba lah ban sngewthuh lane pyndap ïa ka jingthylli ka mynsiem jong ngi. Lada don ka jingthylli hapoh ka jingim jong ngi, nga kyntu ba phin leit sha U bad to pdiang ïa U hapoh ka jingim jong phi khnang ba phin ïoh shisha kata ka jingsuk kaba kane ka pyrthei kam lah ban ai. Ka jingsuk ha U Jisu Khrist kadei kaba ym lah ban die ne thied. Ki kular jong u ki long kiba skhem bad U Khrist Um juh kylla; U long ujuh mynnin, mynta bad shaduh bymjukut. (Hebru 13:8). U Khrist hi U khot bad ong, “To wan ha nga phi baroh kiba thait bad kiba khia ka jingkit, te ngan pynjem ïa phi.” (Mathaios 11:28).

Ka jingsuk kaba U Khrist U ai ka long kum ka wah duid ka bym ryngat shuh bad kaba kwah ban tuid sha kiwei de ki lyngkha. Ka don ka jingdonkam ban ïoh ïa kata ka jingsuk bad ba kan paw ha ka jingim jong ngi bad kan ïaineh hapdeng ki parabangeit ha U Khrist, U Khun U Blei. Nga ong ïa kane ym tang namar ba nga kwah ban pynksan ïa kaei kaba nga shem ba ka long ka jingshisha, na ki jingïashem jong nga mynshuwa, hynrei ka long ka jingshisha namar ba dei tang ha U Khrist ba phi lah ban khmih lynti ban shem ïa ka hima ki bneng ha kane ka pyrthei. Haba phi shem ïa U Khrist, phi la shem bad ïoh ïa ka spah ki bneng bad shisha ka “Hima U Blei” ka la wan ha phi. (Pule Mathaios 13:44-46; Loukas 17:21)

To kynmaw ïa ki kyntien U Jisu, “Wad shwa phi ïa ka hima U Blei, bad ïa ka hok jong u; te kine kiei kiei yn sa ai lang tam ha phi baroh” (Mathaios 6:33). Shuwa ba U Khrist U kren ïa kitei ki kyntien, U ong ba ngim dei ban kuslai kumba kiwei pat ki kuslai ïa kiei kiei kiba jong kane ka pyrthei. (Pule Mathaios 6:24-32). U Khrist U kren ïa kine kiei kiei namar U kwah ban shon ha mynsiem jong ngi ba kiei kiei kiba kane ka pyrthei ka don ban tyrwa kim lah ban pynhun ne pynkmen shisha ïa ngi. Ka jingkmen bad ka jingduh noh ki jingkuslai ka shong halor kata ka jingshisha ba u briew u shem ïa ka “Hima U Blei” bad “ka hok jong U.”

Ko parabangeit, naduh ba phi la pdiang ïa U Jisu Khrist, hato phi la ïoh ka jingsuk bad ka jingkmen kaba phim shem ne ïoh ha kane ka sla pyrthei? Lada ngim pat ïoh mad ïa kata ka jingsuk kaba U Khrist U ong bad kular, da shisha ka mut ba ngim pat aiti shisha ha U Khrist ba Un bsuh bad saiñdur ïa kata ka jingsuk ha ka jingim jong ngi. Lehse ngi shu ngeit lane bud tang ba ngi sngew ba kadei ka jingshisha bad lehse ngi bud tang ba ngi sheptieng. Ka lah ruh ban long ba ïa ngi la kha ha ka long-ïing long-sem Khristan hynrei ngim pat mad pat ïa ka jingdon bad jingpyntngen U Khrist kum Uta “U Nongpyntngen.” Lada kane ka long ka jingïashem jong ngi, te ynda haba ki jingeh bakhraw ki wan, ngin ym lah ban ïeng bad shisha ngin hap bad sakma.

Kine harum ki long ki kyntien kiba nga la sot na ka jingrwai Hindi bad kiba nga la pynkylla kyntien, kiba nga ngeit shimet hi, ba ki kren kyllum ïa ka mat kaba nga kwah ban wanrah hangne.

“Jingieit jong U Jisu kadei ïa baroh lut, dei ïa baroh lut,

Khot ïa i mei i pa, khot da ka jingieit,

To wan, to wan.

Khot ïa hynmen para, khot da ka jingieit,

To wan, to wan.

Khot ïa paramarjan marpar,

To wan, to wan

Jingieit jong u Jisu dei ïa baroh lut dei ïa baroh lut.”

*******