Ynda Kyntiew Ïa U Khrist

U Ïoannis Nongpynbaptis u long u briew uba U Blei U la jied ban long ka sur ba “pyrta ha ka ri khlaw.” Ka khubor jong u la lah ban ïohsngew ba ka sawa hapdeng ka ri khlaw jong ka Judia, “Kylla kaba mut; naba ka hima ki bneng ka la jan.” (Mathaios 3:2). Watla ki briew ki la pdiang ïa kane ka khubor da ka jingshitrhem bad ka jingkhmihlynti ba rhem bha, hynrei kiba bun ki klem shym la lah ban kem ne sngewthuh ïa ka mat pdeng jong kata ka khubor. Ki briew na kylleng ka ri Israel ki la ïawan sha ka rud wah Jordan ban shah skhor bha ïa ka khubor ba une u nongïathuhlypa jong U Blei u la don ban ai. Hynrei, namar ba ki Jiw ki la ban khuslai eh da kata ka jingshah synshar ha ki riew nongwei, ka khubor shaphang kata ka hima ka bneng kaban sa wan shen ka la bat ïa ka jingmut jingpyrkhat jong ki haduh katta katta ba ynda haba U Ïoannis u kdew sha U Jisu bad u ong de, “Ha khmih U Khun langbrot jong U Blei uba kit noh ïa ka pop jong ka pyrthei,” ki kyntien jong u ki i kumba ki hap ha ki skhor ba kyllut. Hynrei u ïai long hi uba ïaineh ha ka jingkhot jong u ba U Blei U la khot ïa u ban pyndep. Ynda haba ki biew ki ïa kylli ïa u lada u long ma u uta U Messiah, ka jubab jong u ka long, “Nga shisha nga pynbaptis ïa phi da ka um; hynrei yn sa wan uba kham khraw ban ïa nga, uba kam dei ïa nga wat ban loit noh wat ïa ka jingteh ki juti jong u: uta keiñ un pynbaptis ïa phi da U Mynsiem Bakhuid bad da ka ding.” (Loukas 3:16).

Hangne ngi sakhi kumno ba U Ïoannis u khlem shym la kwah ban wanrah burom sha lade. Un jin da la jop ïa ki briew sha ka liang jong u lada u la pynbna ba u long ma u U Khrist, hynrei khlem pep u ïai khring ïa ki jingmut jingpyrkhat jong ki briew sha U Jisu kum uta “U Khun langbrot jong U Blei” bashisha. Ki synran jong u ha kawei pat ka liang, kim shym la don kajuh ka jingsngewthuh shaphang ka kam jong U Nongpynbaptis. Ki la mut ba dei tang ma ki kiba U Blei U la jied ban rah ïa ka khubor ka gospel sha ka ri Judia baroh kawei. Namar kata, ki la thrang ban khirng ïa ki briew sha lade. Ynda haba bun ki briew ki la sdang ban leit bud ïa U Jisu bad ki synran jong U, ki synran U Ïoannis ki la bishni ïa U Khrist bad ki la ïit kumno ban pynsangeh ïa ka ministry jong U. Namar ba ki la khmih lynti ba U Ïoannis ruh u don kajuh ka jingsngew ba ma ki ki don, ki la ïaleit sha u da kata ka jingkyrmen ba un ai ïa ka jingkubur ka jong u halor kane ka phang. Hynrei U Ïoannis pat, namar ba um threh satia ban khring briew sha lade bad haba u kynmaw ïa ka kamram kaba la khot bad jied ïa u ban leh, u shu ong ha ki, “Kadei ïa u ban man khraw, hynrei ïa nga ban man rit.” (Ïoannis 3:30).

Ka jinglong ba ïasyriem ka paw ha ki synran bajan tam jong U Jisu. Ka jingsngewthuh babakla ba ka Hima U Blei ka long kaba kynja doh ha kaba U Khirst U long U Syiem jong ka, Uban sa shong halor ka khet, ka la suhthied ha baorh ki khun Israel, kaba kynthup ruh ïa ki synran jong U. Namar kane, ki la ïa kajia hapdeng jong ki shaphang mano ba dei ban long uba khraw tam eh ha kata ka hima. Ki la ïohi ruh kum ka jingma ïa ka jingkwah ka mynsiem ka jong ki ban long kiba khraw tam eh ha ka imlang ka sahlang ynda haba ki ïohi ïa uwei u briew uba la pynkhiah ha ka kyrteng U Jisu ïa kiba pang ksuid. Kum uta uba long shabar jong ka kynhun jong ki, ki synran U Khrist ki la ïohi ïa une u briew kum uba la shah kyntait bad ki la kheiñ ba ki kam jong u ki long kibym lah ban shaniah. Te, da kaba pynsangeh ïa ka kam ka jong u, ki sngew ba ki leh ïa kaei kaei kaba bha na ka bynta ka kam jong ka gospel. Hynrei, ynda haba ki la ïathuh ïa U Khrist kaei kaba ki la leh, U khlem shym la kubur ïa ki jingleh jong ki.

Markos 9:38-40 “U Ïoannis u la ong ha u, Ko Nonghikai, ngi la ïohi ïa uwei uba beh noh ïa ki ksuid ha ka kyrteng jong me; te ngi la adong ïa u, namar um ïabud lok bad ngi. Hynrei U Jisu u la ong, Wat adong shuh ïa U; naba ym don uba leh ïa ka kambah ha ka kyrteng jong nga, uba lah shen ruh ban kren sniew ïa nga: naba jar ubym ïaleh ïa ngi, u long ha ka liang jong ngi.”

Ki jinghikai bakongsan bha lah ban shim na ki jingim jong ki synran U Khrist bad ki synran U Ïoannis Nongpynbaptis. Baroh ar kine ki kynhun ki tip bad sngewthuh ïa ki jingkyrkhu bad ki kabu ksiar ba ki ïoh ban shim bynta. Hynrei ka jingeh ka long ba ki mut ba kine ki kabu ksiar ki long tang ki jong ki hi bad ym don mano mano ruh ba don ka hok ban ïoh pdiang ïa kine kijuh ki kabu ksiar lymda ki long shuwa shibynta bad ka kynhun jong ki. Namar ka kyrdan ba kine ki briew ki bat kum kita kiba la jied ban ïalap ïa ka khubor ka jingshisha, ki mut ba ka jingshisha ka don tang hapoh ka kynhun jong ki. Ha ki, ka long ka bym lah ban long ba lehse kiwei ki lah ban ïoh ïa ka jingshisha ne ba ki lah ruh ban sngewthuh kham bha ïa ka jingkit jingmut jong ka jingshisha. Namar kata, kim lah ban pdiang ba ka long ka jingshisha ba kiwei ruh ki lah ban don kaei re kaei kaba kham bha ban tyrwa, ha kaba ïadei bad kiei kiei kiba kynja mynsiem. Kane ka la pynlong ïa ki ban leh katba lah ban pynsangeh ne ban pynthut ïa ki jingpyrshang jong kiwei kibym don hapoh ka kynhun jong ki.

Ka jingsarong ruh ka la don ka bynta kaba kongsan bha ban pynlong ïa ki ban pyrkhat ba dei tang ki jingleh bad ki jingjied jong ki kiba pynlah ïa ki ba kin ïoh mad ïa ki jingkyrkhu. Ki la klet ba ka la dei ka kti U Blei kaba la tan ïa ki na ka jingdum sha ka jingshai. Ki la kyntiew ïa lade bad ki la pyrshang ban jop ïa ki briew sha ka kynhun jong ki bad ki la klet ba ki la shah khot ban jop ïa ki briew sha ka jingshisha bad U Khrist.

Kane ka phalang ïa ka jinglong jingman jong ka ñiam Khristan ba ha kine ki sngi mynta. Ki don bun ki Khristan ba la shah ïalam bakla ha kine ki sngi kiba kam ba dei tang ka balang jong ki kaba long ka balang jong U Blei. Kam long kaba sngewlyngngoh, namar kata, ba ki kheiñ ba kiwei ki kynhun bad ki balang ki long ki “balang balamler,” bad ba kino kino kiba long dkhot ha kine ki balang kim long hapoh ka jingpyrsad mynsiem bakynja Blei bad baroh kaba ki hikai bad bud ki long kibym dei kat kum ka jinghikai jong ka Baibl. Bad kum U Ïoannis, ki khang ïa kiwei na kaban leh ïa ka kam kaba ba U Blei U la khot ïa ki ba kin leh. Bad kum ki synran, ki balang ruh ki ïaleh ban khring ïa ki briew sha lade hynrei ym sha U Khrist.

Ha kajuh hi ka rukom, ki Jiw ki la long buaid eh da kata ka jingsngewthuh ba dei tang ma ki ba long kata ka jaid bynriew kaba la jied jong U Blei haduh ba ki peit beiñ ïa ki Jentil kum kita kiba don hapoh ka jingtim. Lada dei ba ki la pule bniah ïa ki jingthoh, da kaba buh sharud ïa ki jingsngewthuh briew jong ki ba ki la pynlang lyngba bun bun ki snem, bad lada dei ba ki la ai lad ban shah ïalam da U Mysiem U Blei, kin ym jin da la shah ïalam bakla ha ka jingïohi jong ki ïa lade ne ïa kiwei ruh. Ki kyntien jong ka jutang ba U Blei U la pynlong bad U Abraham ki la biang ban weng lut ïa ki jingsngewthuh ba bakla ba ki don ha kaba ïadei bad ka jingthmu jong U Blei haba U phah ïa la U Khun.

Jenesis 22:18 “Bad ha u symbai jong me ki jaid bynriew baroh ka pyrthei kin ïapynkyrkhu ïa lade; naba me la kohnguh ïa ka ktien jong nga.”

Ki Jiw bad ki Jentil kin long kiba la kyrkhu ha U Khrist. Kin ym don kiban long kiba la kyrkhu tang namar ba ki long ki dkhot jong kano kano ka kynhun ne ka balang. Namar kata, ka long kaba shongnia ba ka jingpynim ka wan tang da ka jingngeit ha U Khrist hi. U Paul u kren shai halor kane ka jingshisha ha ki parabangeit ha Galatia.

Galatia 3:26-29 “Namar phi baroh phi long ki khun U Blei da la jingngeit ha U Khrist Jisu. Namar kat kiba na phi ïa kiba la pynbaptis ha U Khrist phi la kup keiñ ïa U Khrist. Ym lah don U Jiw lymne U Grik, ym lah don u mraw lymne uba laitluid, ym lah don shynrang bad kynthei: namar phi baorh phi ïalong uwei ha U Khrist Jisu. Te lada phi long ki jong U Khrist, kumta te phi long u symbai U Abraham, ki nongïoh pateng keiñ katba kum ka jingkular.”

Da shisha keiñ, ka balang U Blei ka kynthup ïa ki briew kiba wan na ki jingïashem bapher bapher, khlem da kheiñ ïa ka jaidbynreiw, ne ka kolshor, ne ka ktien ka thyllieh bad kiwei kiwei de ki jinglong ba kine ki briew ki don. U Jisu ruh U ong ba un sa wallam ïa kiwei pat ki langbrot ki bym pat shym la don hapoh ka jingker ka jong U. Kane ka jingker ka long ka balang jong U.

Ïoannis 10:16 "Nga don kiwei pat ki langbrot ruh kibym long na kane ka jingker; ïa kita ruh ka dei ïa nga ban wallam, bad kin sngap ïa ka ktien ka jong nga; te kin ïalong shi kynhun, bad uwei u nongaplangbrot.”

U Jisu U kren ïa kine ki ha ki nongbuh jong U kiba ha kato ka por ki don hapoh “ka jingker jong U.” Ka daw ba “kiwei pat ki langbrot” kim shym la don ha kane ka jingker ka long namar ba kim pat shym la ithuh ïa U bad kim pat shym la long ki nongbud jong U. Namar kata, ban long shibynta bad ka balang U Blei, ka dei ïa ngi ban ithuh ïa U Khrist, ngeit ha U, aiti ïa la ka jingim ha U bad bud ïa U. Bad kumno U Jisu U jied ban leh ïa kane? U la jied ïa ki briew kum manga bad maphi ba pyndep ïa kane ka kam. Kum U Ïoannis Nongpynbaptis, ka kamram jong ngi kam dei ban khring ïa ki briew sha lade ne sha ka kynhun jong ngi hynrei ka dei ïa ngi ban kyntiew ïa U Khrist bad ban khring ïa ki briew sha U. Da kaba leh ïa kane, ngi lah ban kdew ïa ka jingmut jingpyrkhat jong ki briew sha ka jinglong baitynnad jong U Khrist bad ka jingaiei ba pynim jong U. Ki kyntien U Jisu hi ki kit jingmut shibun eh shaphang kane ka jingshisha haba U ong, “Nga te, ynda la kyntiew ïa nga … ngan pynwan ïa ki briew baroh ha lade.” (Ïoannis 12:32). Watla ka jingmut batynrai jong kane ka dkhot ka kren shaphang ka jingshah sah narphna jong U, hynrei ka long ruh ka jingshisha bakynja mynsiem ba lada ngi kyntiew ïa U, ki briew ruh kin shah khring sha U. Baroh ki jingkyntiew ïa ka lade kin jah lut ha U Khrist bad ma U Un long ka mat pdeng jong ki jingïakren jong ngi. Halor kane ka jingshisha, ka long kaba shisha ba ka jingim bymjukut ka long ban ïoh ithuh ïa U Blei bad U Khun jong U, U Jisu Khrist. (Ïoannis 17:3).

*******