Ka Mynsiem U Nonglehpyrshah U Khrist

Ka gospel jong ka hima ba la ïalap ka long U Khrist baim ha ki riewngeit jong U da U Mynsiem jong U. Kane ka jingshongsah jong U Khrist hapoh ka mynsiem ka pynthikna ïa ka jingpynim bad ka jingim bymjukut ïa ngi. Ha kiwei pat ki kyntien, ka long “U Khrist ha phi” kaba pynkylla ïa u nongpop sha u bahok. Ha kaba ïadei bad kane ka jinghikai, Shaphang kane ka jinghikai, U Paul u khot ïa ka ka jingmaïan kaba na U Blei, kaba la burieh da ki rta babun bad mynta la pynpaw ha kita kiba ngeit ha U Khrist.

Kolossai 1:25-27 “Ïa kata la pynlong nongïalap ïa nga, katba kum ka jingpynïaid niam jong U Blei ïa kaba la aiti ha nga shaphang jong phi, ban pyndep ia ka ktien U Blei; (26) ïa kata ka jingmaïan keiñ ïa kaba la buhrieh na kita ki aïom bad na ki pateng bynriew baroh, hynrei mynta la pynpaw ïa ka ha ki riewkhuid jong u: (27) ha kiba U Blei u la imon ban pyntip katno ka long kata ka jingkynrei spah ka burom kane ka jingmaïan hapdeng ki Jentil; kaba long keiñ U Khrist ha phi, ka jingkyrmen ka burom.”

Ha man la uwei-pa-uwei u thied ksai jong ka jingshisha, u nongshukor bakhrawtam u ïaleh ban pyrthuh bud ne ban wanrah ka jinghikai bakhyllah kaba ïajan bha bad ka jingshisha ne kaba long marpyrshah ïa ka. Kum ka nuksa, ka jinghikai babakla shaphang ka jingïap ka ïajan bha bad ka jinghikai jong ka Baibl, ba ka long kaba suk bha ba ki briew kin shah ïalam bakla. Ha kawei pat ka liang, ka jinghikai shaphang ka jingmane bleithaw ka long kaba shai bha ha ka Baibl ba ka long pyrshah ïa ka mon U Blei hynrei u ksuid u la lah bha ban pynlong ïa ka pyrthei baroh kawei ban ngeit ba ka jingmane bleithaw ka long kaba bha.

U Soitan um shym la kiar na kaei kaei ruh bad u la lah pynsniew ïa ka jingshisha shaphang ka Hima U Blei bad ha ka jingleh jong u kumta, babun ki shah ïalam ban ngeit bad hikai ïa ka lamler. U Paul u la maham ïa kane ka jinglamler, kaba ïa dei bad ka gospel jong ka hima, ha ka shithi jong u sha ki Nong Thessaloni ha kaba u la jer kyrteng ïa ka, “ka jingmaïan ka jingbymhok.”

2 Thessaloni 2:7 “Namar kata ka jingmaïan ka jingbymñiew hukum *[ka jingbymhok] ka la trei lypa: tang ba don uwei uba khang mynta, tad ynda yn weng noh ïa u.” *Ka kyntien phareng “iniquity” ka mut ruh “ka jingbymhok”.

Kaei ka mat bakongsan jong kane ka jingmaïan ba U Paul u thoh sha ki nong Thessaloni? Kiei ki jingjia kiba ïalam sha ka jingseisoh jong kane ka jingmaïan? Bad kaei ba U Paul u mut haba u kren shaphang kane ka jingmaïan?

Ka jingsngewthuh babakla eh kaba ïadei bad ka jingwan arsien U Khirst ka la don hapdeng ki parabangeit ka shnong Thessaloni. Don kiba la hikai ba ki la im ha ka tmier ka jingwai noh ka pyrthei bad ba U Khrist U la jan wan tad.

Ki Khristan ki la sngewkhuslai ban ïohsngew kum kane jait khubor bad ki la sdang ban shim ki synjam ban pynkhreh na ka bynta kane ka jingjia. U Paul u la shim kylluid ïa ka lad ban pynthanda ïa ka jingmut jingpyrkhat jong ki da kaba pynkynmaw ïa ki ïa kaei kaba u la lah kren ha ki shaphang ki jingjia kiba dei ban jia, ha ka lawei, kiban wanrah ïa ka jingwan arsien jong U Khrist.

2 Thessaloni 2:1-5 “Te ngi kyrpad ïa phi, ko para bangeit shaphang kata ka jingwan U Jisu Khrist uba U Trai jong ngi, bad ka jingïalang jong ngi ha u: (2) khnang ban ym pynkhih shen ïa phi na la ka jingmut, lymne pynkhuslai ïa phi, lane da ka mynsiem, ne da ka ktien, ne da ka shithi kumba na ngi keiñ, kumba kata ka sngi ka jong U Khrist ka la wan. (3) Wat ai ba uno uno ruh un shukor ïa phi da kaba kumno kumno ruh: naba kata kan ym wan, lymda jia shuwa kata ka jingphaidien, bad ba yn ïoh pynpaw noh ïa uta u briew jong ka pop, u khun jong ka jingjot; (4) uta uba ïaleh pyrshah bad uba pynsarong ïa lade pyrshah ïa baroh ba la khot Blei lane ba ju mane: kat haduh ba u shong ha ka templ U Blei, u da leh Blei ïa lade. (5) Hato phim ïakynmaw ba, mynba nga dang don lem bad phi, ngi la ïathuh ha phi ïa kine kiei kiei ruh?”

U Paul u ong, ha ka dkhot balai, ba shuwa ka jingwanarsien, kan don ar tylli ki jingjia – ka jingphaidien bad ka jingpynpaw ïa u briew jong ka pop.

KA JINGPHAIDIEN

Ka jingphaidien noh, kumba la kren da U Paul, ka long ka jingphaidien ka balang Khristan na ka jingshisha kaba pynïapher ïa ka na ki ñiam bapawnam ha kito ki por. Ban sngewthuh shaphang kaei shisha ba kane ka jingphaidein ka kren, nyngkong eh ka jingsngewthuh badei katkum na ka Baibl shaphang kaei ba pynlong ïa u briew U Khristan, ka long kaba donkam. Nangta pat, ngin sa ïa peit ïa ka histori jong ka balang ha ki ïa banyngkong eh.

Uei U Khristan?

Kaei kaba pyntbit ïa u briew ban khot ïa u U Khristan kam kynthup tang kata ka jingphla ba u ngeit ha U Khrist. Kam dei ruh ka jinglong ba u don ka jinglong dkhot ha kano kano ka balang bad ba u sumar ïa ki aiñ jingngeit jong ka. U Khristan u dei uta ha uba U Khrist U shongneh. Ka jingshongneh U Khrist ha ka dohnud, da U Mynsiem jong U, ka long kata kaba pynlong ïa u briew U Khristan. U Khrist U lah ban im ha ngi tang lada ngi aiti ïa lade sha U bad ha kane ka rukom, ngi long ki jong U. Hynrei, kaba pyrshah ïa kane ka long ka jingsshisha shaphang ubym ngeit.

Rom 8:9 “Hynrei lada uno uno ruh um don U Mynsiem U Khrist, uta keiñ um long u jong u.” Ka Jingseng Ïa Ka Ñiam Khristan

Ka jingseng ïa ka ñiam Khristan ka la sdang ha ka jingtheh buk ïa U Mynsiem Bakhuid ha ka sngi Pentekos, 31 HK, shiphew sngi hadien ka jingshahrong noh U Khrist sha bneng.

Shilynter ka jingshakri ka jong U ha kane ka sla pyrthei, U Jisu U la ïai ban shi ïai ban ïa kata ka jingshisha ba Un sa shongsah ha ki dohnud jong kiba ngeit. Ha ka jingkren shaphang U Nongpyntngen Uba la kular, U Mynsiem ka jingshisha, U Khrist U ong ba U (U Nongpyntngen) U ïaisah lem bad ki synran jong U bad ha ka lawei Un sa don hapoh dohnud jong ki.

Ïoannis 14:16,17 “Nga ruh ngan duwai ïa U Kpa, te Un ai ha phi ïa Uwei pat U Nongpyntngen, ba Un ïoh ïaisah lem bad phi ha la ka rta, (17) ïa U Mynsiem ka jingshisha keiñ; ïa Uba ka pyrthei kam lah ban pdiang, naba kam ïohi ïa U, lymne kam ithuh ïa U: phi hynrei phi ithuh ïa U, namar U ïaisah bad phi, Un long ruh ha phi.”

Haba kren shaphang U Nongpyntngen, U Khrist U kren shaphang jong U hi, naba ha ka dkhot 18, jong kajuh ka lynnong, U ong ba Un ym ieh khunswet ïa la ki synran. Ha ka dkhot 23, U nang ïai ban ba ma U lem bad U Kpa Kin ïasah bad uba ngeit.

Ka Jinghap U Lusifer bad U Briew

Katba ka mynsiem u briew ka dang ïateh bad ka mynseim U Kpa bad U Khrist, u briew u long uba hok. Ka dei lada u briew hi, da ka mon sngewbha jong u, u jied ban pynïakhlad ïa lade na U Blei bad U Khun jong U ba u kylla long u nongpop. Ka pop ka long ka jinglong ha kaba ka don ka jingïakhlad na U Blei. Shabar jong U Blei, ka don tang ka jingsniew suda.

U Lusifer bad ki angel jong u, U Adam bad Ka Im ki kylla long ki nongpop ha ka khyllipmat ba ki pynïakhlad ïa lade na U Blei. Ka jingbymngeit ka jong ki ka pynlong ïa ki ba kin pynleh jingmut ha lade bad kaei kaba ki lah ban leh ne ban kot, khlem ka jingdon ryngkat U Blei. Ki la sdang ban tharai ba wat khlem U Blei ruh ki lah ban ïai long kiba bha bad kibym thoh bria. Peit bha ïa ka “NGAN” ha kine ki dkhot na Isaiah.

Isaiah 14:12-14 “Kumno me la hap na bneng, ko lurshai, u khun jong ka step! kumno la ot noh ïa me sha ka khyndew, uba la ju pyndem lin ïa ki jaid bynriew! (13) Te me la ong ha la ka dohnud, Ngan kiew shabneng, ngan kyntiew ïa la ka khet haneng ki khlur jong U Blei; bad ngan shong halor u lum ka jingïaseng, ha kiba kut phang shatei: (14) ngan kiew sha lyndet ki lyoh; ngan long kum Uba hajrong tam.”

Ka Balang Khristan Ha U Spah Snem Banyngkong

Ka juh hi ka jingeh ba ngi la pule ha Isaiah kaba la pynkhyllem ïa U Lusifer, ka long ka jingeh kaba la sdang ban ban ïa ka balang Khristan ha u spah snem banyngkong. Kumba khadsan ne arphew snem eiei naduh ba la seng ïa ka ñiam Khristan, ïa U Khrist la ïalap bad kyntiew. Katba dang pynleh jingmut ha U, ki kambah la leh bad ka balang ka la don ha ka jingïatylli lang kawei. Hynrei ka khlem shym la slem ba ki briew jong U Soitan kin wanrah ïa ki jinghikai bad jingngeit bakhyllah kiba la pynpoh ïa ka jingmut basngur jong ka gospel.

Ka Jingïalang Ha Jerusalem

Hapdeng ki parabangeit jong ka ñiam Khristan ha ki ïa banyngkong eh, la don ki Pharasi. Ki ïa pynbor ba tang ka jingdon ïa U Khrist hi kam pat biang ban pyntikna ïa ka jingpynim jong u briew. U parabangeit, la u long U Jiw ne U Jentil, u donkam ban sumar ïa ki aiñ ki rukom jong ka hukum U Moses khnang ba u lah ban ïoh ïa ka jingkyrmen ïa ka jingim bymjukut. Ha kiwei pat ki kyntien, mynta ka jingpynleh jingmut ka la kynriah noh sha ki kam bad ki jingïakhun u briew kum ka lynti sha ka jingpynim. Kane kam shym long ka gospel ba la ïalap da U Khrist bad ki apostol jong U. Kane ka la wanrah ïa ka jingkulmar bakhraw hapoh ka balang bad ka la don ka jingma ba ïoh kan mih ka jingïapait ïapra na kane ka daw. Namar kata, ka la long kaba donkam ban khot ïa ka jingïalang paidbah jong baroh ki rangbah balang, ki apostol bad ki dkhot bakongsan jong ka balang khnang ban ïa kren halor ki jingeh ba ïadei bad kane ka mat.

Ki Kam 15:1,5 “Te la don ki briew ba la wan hiar na Judia, bad ki la hikai ïa ki parabangeit, ki ong, Lymda ot sher ïa phi kat kum ka ñiam ka rukom U Moses, phim lah ban ïoh lait im.

(5) “Hynrei la ïeng kiba na ka kynja Pharisi kiba la ngeit, ki da ong, Ka dei ban otsher ïa ki, bad ban hukum ïa ki ban sumar ïa ka hukum U Moses.”

Ki Kam ka lynnong ba khadsan ka la buh jingthoh ïa ka jingjia ha ka jingïalang jong ki nongïalam balang kaba la pynlong ha Jerusalem. Ka jingïakren bad jingïania ka la long kaba khluit bha ha kane ka jingïalang. Ka jingïalang ka long kaba la ïapait arliang. Ka liang kaba nyngkong ka long kato kaba la kren myntan ha ki dkhot hangeng (Ki Kam 15:1,5) kaba kyrshan ïa ka jinghikai ba ka jingpynim ka long lyngba ki kam jong ka hukum katba, ka liang kaba ar pat, kaba la ïalam da ki briew kum U Paul, U Petros, U Barnabas, ki kyntiew ïa ka jinghikai ba ka jingpynim ka long da ka jingaiei da ka jingngeit ha U Khrist.

Hadien ka jingïakren bajlan bha, ka rai ba khadduh la shim. La rai ba ki Jentil kiba la ngeit kim donkam ban sumar ïa ki hukum U Moses hynrei ki Jiw pat la pynlong, kum ka jingdawa, ban sumar ïa kine ki hukum. Hynrei ha kajuh ka por pat, la mana ïa ki Jentil ba kin kiar na kaba bam ïa ka doh jong ki mrad ba la kñia sha ki blei thaw, ban dih ïa ka snam, ban bam ïa ka doh jong ki mrad ba la shu pynïap da kaba shu ksih bad na ka jingklim. Hynrei, wat ha ka jingrai kaba ïadei bad ka rukom im jong ki Jentil ruh, kam shym la don kano kano ka jingkren shaphang U Khrist bad ki buskit jong U.

Ki Kam 15:19,20 “Naba kumta ka jingkut jingmut jong nga ka long, ban ym pynkhuslai shuh ïa kiba napdeng ki Jentil kiba phai sha U Blei, (20) hynrei ba ngin thoh sha ki ba kin kynriah noh na ki jingbittngit ki bleithaw, bad na kaba klim, bad na kaba la khyrwait, bad na ka snam de.”

Kawei Pat Ka Gospel

Hynrei katto katne snem hadien kane ka jingïalang, ki Pharisi bad kito kiba kyrshan ïa ka jinghikai ka jong ki, ki la bteng ïa ka jingdawa na ki Jentil kiba la ngeit ba kin sumar ïa ki hukum U Moses. Ka sabut ïa kane lah ban shem ha ka shithi U Paul sha ka balang ha Galatia ha kaba bun na ki dkhot jong ka ki long ki Jentil. U Paul u pynbna da kaba shai ha ka shithi ka jong u ba kiba ngeit ki “la kynriah noh shen” na kata ka gospel kaba u la ïalap ha ki naduh kaba nyngkong. Ki nong Galatia ki la sdang ban ngeit bad hikai ba ka long kaba donkam, khnang ban ïoh jingpynim, ban shah otsher bad ban sumar ïa ki hukum U Moses. U Paul u la jer kyrteng ïa kane ka jinghikai bakla kum “kawei pat ka gospel.”

Galatia 1:6-12 “Nga sngew lyngngoh ba phi la kynriah noh shen katta katta na Uta Uba la khot ïa phi ha ka jingaiei U Khrist sha kawei pat ka gospel, (7) kabym long kawei pat ka gospel; hynrei tang ba don kiba pynkhuslai ïa phi, bad kiba kwah ban pynkylla sniew ïa ka gospel U Khrist. (8) Hynrei lada ma ngi, lane u angel na bneng, ngi ïathuhkhana ha phi ïa kano kano ka gospel kaba pher na kaba ngi la ïathuhkhana ha phi, to ai ba un long uba la tim noh, (9) kumba ngi la ong mynshuwa, nga ong kumjuh mynta pat, Lada uno uno u la ïathuhkhana ha phi ïa kano kano ka gospel kaba pher na kaba phi la pdiang, to ai ba un long uba la tim noh. (10) Namar hato mynta nga bhoh ïa ki briew, ne ïa U Blei? lane nga wad ïa kaban pynsngewbha ïa ki briew? lada nga dang pynsngewbha ïa ki briew, ngam shym long u shakri U Khrist. (11) Hynrei nga pyntip ha phi, ko parabangeit, shaphang kata ka gospel kaba la ïathuhkhana ma nga, ba kam long katba kum u briew. (12) Namar ngam shym la pdiang ïa ka na u btriew, lymne ym shym la hikai ïa nga ha ka, hynrei ka la wan ha nga da ka jingpynpaw U Jisu Khrist.”

Ka gospel kaba U Paul u ïalap ka la long da ka jingpynpaw U Jisu Khrist. Ka long kaba shongnia, namar kata, ban ong ba kajuh ka gospel ba U Khrist U ïalap U Paul ruh u ïalap ïa ka.

Ka Jinghikai U Nongleh Pyrshah U Khirst (Antichrist)

Katba ka balang ka ïai ngam jylliew bad kham jylliew ha kane la jinghikai ba bakla, ka la sdang ban ngeit ba U Khrist marwei Um long ka lynti sha ka jingpynim; ba don sa kiwei ruh ki lynti kiba ïalam sha ka thong kaba kongsan tam jong ka jingpynim. Bad katba nang ïaid ka por, ka jinghikai ka jong ki ka la kylla sha kata kaba kyrshan ïa ka jingmut ba U KHRIST UM LONG SHUH KA LYNTI SHA KA JINGPYNIM!!!

Ban ïahap sur bad kane ka jinghikai ba bakla, ka jingsngewthuh bapawnam ba U Khrist Um im shuh ha kiba ngeit ka la sdang ban don bor bha! U Paul u ong ba kane ka jingmaïan ka jingbymhok ka la treikam wat naduh kito ki por ki jong u. U Petros bad U Ïoannis ruh ki kren ïa kane kajuh ka mat.

2 Petros 2:1 “Hynrei ki la don ki nongïathuhlypa balamler ruh hapdeng uta u paitlang, kumba hapdeng jong phi ruh kin long ki nonghikai balamler, kiban wallam tuh hapoh ki jinghikai bakla bapynjot noh, bad haba ki len noh ïa Uta U Kynrad Uba la siewspah ïa ki, ki da pynwan kumta da lade hi ïa ka jingpynjot kaba stet thir thir.”

U Petros u ong ba kine ki nongïathuhlypa bad ki nonghikai balamler ki ïa len ïa U Jisu Khrist. Ngin ïa peit kham bniah ïa kane ka mat kham katto katne. Hynrei nyngkong eh, U Ïoannis u ong ba kine ki nongïathuhlypa bad nonhikai lamler ki long ki nongïalehpyrshah ïa U Khrist (antichrists) kiba ïalap ïa kawei pat ka gospel kaba long marpyrshah ïa ka gospel jong U Khrist.

1 Ïoannis 2:18 “Ko khun hep, ka long ka por bakhadduh: bad kumba phi la ïohsngew ba uta uba ïaleh pyrshah ïa U Khrist (antichrist) u wan, wat mynta ruh la mih noh shibun kiba ïa leh pyrshah ïa U Khrist; nangta keiñ ngi tip ba ka long ka por bakhadduh.”

Hangne U Ïoannis u ong ba don shibun ki nongïalehpyrshah ïa U Khrist. Kaei kane ka “jinghikai bakla bapynjot noh” ba kine ki nongïalehpyrshah ïa U Khrist ki hikai?

Ïoannis 4:3 “Bad ka mynsiem baroh kabym phla ba U Jisu u wan ha ka doh kam long na U Blei. Te kane ka long kata ka mynsiem jong u nongïaleh pyrshah ïa U Khrist; shaphang kaba phi la ïohsngew ba ka wan, bad mynta keiñ ka la don lypa ha ka pyrthei.” (Jingpynkylla ktien na ka King James Version)

2 Ïoannis 7 “Naba shibun ki nongshukor ki la ïaleit mih sha ka pyrthei, kibym ïa phla ba U Jisu Khrist u wan ha ka doh. Une keiñ u long uta u nongshukor bad u nongïaleh pyrshah U Khrist.”

Ha baroh kine ar ki dkhot, U Ïoannis u la kren ba kine kiei kiei ki la jia ha kato ka ïa ka jong u, katba u dang im. U la ong ba ka jinghikai jong u nongïaleh pyrshah U Khrist kam ong ba U Khist “u wan ha ka doh.” Kane kam kren shaphang ka jinglong wan briew ka jong U Khrist. Kaei kaba U Ïoannis u ong ka long ba, ki nongïaleh pyrshah U Khrist ki hikai ba U Khirst Um wan ban im hapoh uba ngeit. (“…bym phla ba u wan ha ka doh.”) Ha kiwei pat ki kyntien, “kawei pat ka gospel” kam kynthup ïa “U Khrist ha phi.” Ka long pynban ka hukum ba bat ïa ka kyrdan ba kham kongsan ban ïa U Nongai hukum. Ka jingmih na kane ka long ka ñiam bapyrkhing ha ka aiñ (legalistic religion), kabym don ïa U Khrist bad kabym ngeit Blei.

Kane ka gospel bathoh bria ka ïahap bad ka jinghikai jong ka lai-ha-uwei kaba kyntiew ïa ka jingmut ba ym shym dei U Khrist hynrei uwei pat ïa uba la tip kyrteng kum “U Blei U Mynsiem Bakhuid” Uba im ha phi. Kane ka jinghikai ka shim noh ïa U Khrist na uba ngeit. Haba U Khrist Um long shuh shibynta bad ka jingim jong ngi, ka jingjop ka jong U kam long shuh ka jong ngi. Kaei kaba la khmih lynti ba ngin leh ka long, ba ngin pyrshang, tang da ki kam jong ngi, ban ïoh ïa kata ka jingjop. Lehse ngin ym sngewthuh ba ngi nang ïai ngam kham jylliew ha ka jingbymdon jingkyrmen bad ka jingïakhun pyrshah ka pop kaba neh junom.

U BRIEW KA POP

Ka jingsngewthuh jong ka hok da ki kam ka ïahap sur bad ka jinghikai bapawnam ha kine ki sngi ba u briew um donkam shuh ïa U Blei naba u mut ba u don ha u ka bor ban long uba bha shabar U Blei. Hynrei ka Baibl ka hikai ba “ym don uba bha hynrei tang uwei, uba U Blei.” (Mathaios 19:17)

Ka New Age Religion

Ka long kaba phylla ban tip ba ka jingïakhih ñiam jong ka new age ne ka new age religion ka hikai ba u briew u long bakynja blei. Khnang ba ki jinglong bakynja blei ki jong u kin pynpaw pyrthei ïa lade, u breiw u donkam ban shu leh tang kawei ka kam bad kata ka long, ba un dwai puson (meditate) bad ba un pynïaid (channel) ïa kane ka bor kaba don hapoh jong u. Kane ka la biang ban sngewthuh balei ba ka yoga ka long ka tamasa bapawnam bha ha ka pyrthei salonsar.

Ka Jinglen ïa U Kpa bad U Khun

Kawei na ki daw bakongsan bha kaba pynlong ïa U Lusiphar ban ïaleh pyrshah ïa U Blei ka long namar ba u sngew ba u lah ban ïai long uba bha, bad lehse uba kham bha ruh, khlem ma U. U la pynrung ïa kane ka jingmut ha ki jingmut jingpyrkhat jong ngi. Lada kane ka jinghikai ka long kaba dei, hato ngin dang sngew ba ngi donkam ïa U Blei? Kane ka dei kaei kaei kaba ki nongïaleh pyrshah U Khrist ki la hikai bad ki dang ïai bteng ban hikai haduh kine ki sngi sha ka pyrthei. Hangne ka don shuh kaei kaba U Ïoannis u kren shaphang u nongïaleh pyshah U Khrist.

1 Ïoannis 2:22,23 “Uei long uta uba lamler, lymba dei uta uba len noh ba U Jisu u long uta U Khrist? Une u long uta u nongïaleh pyrshah ïa U Khrist, uta uba len noh ïa U Kpa bad U Khun. (23) Uwei pa uwei baroh uba len noh ïa U Khun, um don ruh ïa uta U Kpa: uta uba phla ïa U Khun, u don uta U Kpa ruh."

Peit kaei kaba U Ïoannis u ong. Nyngkong eh u kylli ïa ka jingkylli ba lada u lamler ne u nongïaleh pyrshah u len ne em ba U Jisu U long U Khrist ne U Messaïa. U ai ïa ka jubab ha ka sentens babud, ba u lamler ne u nongïaleh pyrshah u long uta ubym len ba U Jisu U long U Khrist hyrei pynban u len ïa U Kpa bad U Khun. Kumno U len ïa U Kpa bad U Khun? Ka dkhot 23 ka ïathuh ïa ngi. U Ïoannis u ong ba u nongïaleh pyrshah U Khrist u len ïa U Kpa bad U Khun da kaba um phla ïa U Khun. Kaba mut ba um shah ïa Ki ba Kin don bynta ha ka jingim jong u namar ba um ngeit ba U Blei U don ka bor ban pynkylla ïa u nongpop sha u riewhok. Kane ka batai shai ïa ka jingmaham U Petros ba u ai ha 2 Petros 2:1.

Ka jingmihpaw jong kane ka jinglong lah ban shem ha ki Pharisi kiba la ‘pdiang’ ïa ka jingngeit Khristan. Kine ki briew ki la pdiang ïa ka ñiam Khirstan namar ba ki ngeit ba U Jisu, ïa uba ki la sah nar phna, U long shisah U Khrist. Hynrei ha kajuh ka por pat, ki len ban ailad ïa U ban don bynta ha ki jingim jong ki. Haba ym shem ïa U Khirst ba U im ha ka dohnud, yn ym shem ruh ïa U Kpa ba Un im hangta. Kum ka jingmih, ki Pharisi ki im ka jingim ba klem Blei. Te balei ki la jied ïa kum kata la lynti? Namar, kum U Lusifar, ma ki ruh ki la ïa pyrkhat ba ki long kiba la biang lut. Kane ka jinglong, kaba la ïai sah ha ki katto katne ki dkhot jong ka balang ha ka ïa banyngkong, ka la pynmih ïa u breiw ka pop. Ha ka jingshisha, U Ïoannis u la jer kyrteng ïa kum kine ki dkhot kum kita kibym shym la long shibynta bad ka balang. Ban pynwan ha ki kyntien ba suk, kine ki parabangeit balamler kim shym la long satia ki Khristan hynrei ki la shu i kumba ki long ki Khristan tang na sla.

Ka Tyllong Jong Ka Kyrdan U Pope

Ïa ngin ïa peit sa shisien ïa ka shithi U Paul sha ki Nong Thessaloni kaba ïadei bad u breiw ka pop.

2 Thessaloni 2:3,4 “Wat ai ba uno uno ruh un shukor ïa phi da kaba kumno kumno ruh: naba kata kan ym wan, lymda jia shuwa kata ka jingphaidien, bad ba yn ïoh pynpaw noh ïa uta u briew jong ka pop, u khun jong ka jingjot; (4) uta uba ïaleh pyrshah bad uba pynsarong ïa lade pyrshah ïa baroh ba la khot Blei lane ba ju mane: kat haduh ba u shong ha ka templ U Blei, u da leh Blei ïa lade.”

U briew ka pop u pynbna ïalade ba u long U Blei! Ha kiwei pat ki kyntien, Une u briew u ong ba um donkam shuh ïa U Blei ban long uba bha. Te, kaei kaei kaba u ong ne leh, ym don ba nud ban kren pyrshah namar ka jingtieng ba ïoh shah pynrem ne kren beiñ ha kiwei. Kane ka juh ka jinglong la mihpaw ha ka jingïalang ha Jerusalem.

Wat hadien ba U Petros, U Paul bad U Barnabas ki la ïa phla ba ïa U Mynsiem Bakhuid la theh buk ha ki Jentil kiba la ngeit, kibym shym la hap ban sumar ïa ki hukum bad ki aiñ jong ka ñiam ki Jiw, ka jingïalang ka khlem shym la lah ban poi sha ka rai naba na ka liang jong ki Pharisi ki kyntait mardor ïa ki sakhi sabut kiba pynthikhna ba ki la long kiba bakla. Ka la dei tad haduh ba uwei u briew u la ïeng bad u la pynbna ïa ka jingsngew ka jong u shaphang kaei kaba long ka ka lynti bha eh ban shim khnang ban wanrah ïa ka jubab ïa ka jingeh, ba ka jingïania ka la sangeh bad ka jingrai la shim. Une u briew u long U Jakob, uba shipara bad U Jisu. Ki nongïalam ka balang ki la ïa kyntiew burom ïa une u briew bad ki la ñiew kor ïa u kum u khlieh ka balang tang na ka daw ba u don ka jingïateh bad U Khrist lyngba ka snam.

U Khrist U khlem shym la buh ba ka balang ka dei ban bujli ïa U kum U Khlieh jong ka. Hynrei sngewsih ban ong, ba ka la jia kumne. Da kaba ki kynriah noh ïa ka jingpynleh jingmut jong ki na U Khrist bad da kaba pynleh jingmut sha kata kaba long kaba khuid, ba hok bad babha (ka hukum), ki la sdang ban ym ïohi shuh ïa U Khlieh bashisha jong ka balang. Khadduh ïawai ki la jied ïa u briew kum u khlieh bathymmai ban bujli ïa U Khlieh bashisha. Te ka la long ha ka jingïalang ha Jerusalem ba ki nongïalam ka balang ki la bet ïa u symbai uba hadein u la kylla long ka kyrdang jong U Pope! Kam long te kaba phylla ba uno uno uba bat ïa kane ka kyrdan, u pynbna ba u long marryngkat bad U Blei ne, teng teng, U Blei hi.

Kumno pat shaphang kito kibym ïasnoh bad ka balang Katholik? Ka long kaba shisha ba ki balang kiba la ïapait na ka balang Katholik kim don ïa u pope ban synshar halor ki jingïatiplem jong ki. Hynrei ka jingshisha ka ïai neh ba wat ha kine ki seng ruh, ki briew ki shah hikai ban khmih sha ki pastor bad ki nongïalam ban ïoh jinghikai. Ka jingpyleh jingmut jong ki la pynkynriah noh na Uta Uba long ka lynti, ka jingshisha bad ka jingim. Ka jingkylli ka long: Hato u pope lane u pastor u lah mo ban pynim ïa phi?

Bun ki Nongïaleh Pyrshah U Khrist

Sa kawei ka mat ba ngi dei ban peit ka long ba don bun ki nongïaleh pyrshah U Khrist. Katba nga dang heh dang san, la shah hikai ba u nongïaleh pyrshah U Khrist u kynthup tang ïa ka kyrdan jong u pope. Kane kam long katkum ka jinghikai ha ka Baibl. Ka ktien “u nongïaleh pyrshah U Khrist” ka long ka jingkhot ba la pyndonkam ban khot kyllum ïa kito baroh kiba hikai ba U Khrist Um im ha u bangiet. (peit 1 Ïoannis 1:18; 2 Ïoannis 7.) Ban long u nongïaleh pyrshah U Khrist lane u briew ka pop, kam da donkam ba uno uno ruh un dei beit ban long u pope ne u pastor lane uba pdiang ïa ka jinghikai lai-ha-uwei ruh. Ki Pharisi kim shim la ngiet ha ka lai-ha-uwei. U Jakob um shym la dei u pope lane u pastor. Kaei kaba u briew u donkam ban leh ka long ba un shu ngeit bad hikai ba u long uba la biang lut nadong shadong bad ba, da ka bor jong u hi marwei, u lah ban sumar khuid ïa ka hukum. Kynmaw, phim lah ban im ïa ka hukum lymbda U Hukum Baim U im hapoh jong phi.

“Ma nga long u dieng sohwain, ma phi ki tnat. Uta uba ïaineh ha nga, bad ma nga ha u, uta u seisoh shibun: naba khlem ma nga phim lah leh ei ei ruh em.” (Ïoannis 15:5)

“Te shaphang jong phi, kata ka jingpynsleh ia kaba phi la pdiang na u ka ïaisah ha phi, te phim donkam shuh ba uno uno ruh un da hikai ïa phi: hynrei kumba kata ka jingpynsleh jong u ka hikai ïa phi shaphang kiei kiei baroh, bad ka long kaba shisha, bad kam long kaba lamler, te kumta kumba la hikai ïa phi. phin ïaisah ha u.” (1 Ïoannis 2:27)

******