Jingiaseng Ialap Shillong 2025 | Mission report

Ka jingaiei bad ka jingsuk to kan long ha phi na U Trai jong ngi, U Jisu Khrist.

Nga sngewkmen ban iasam bad phi ia kane ka report shaphang ka jingiaseng ialap jong ngi ha kaba la long ha ka 12th, 13th bad 14th December 2025 ha Mawkhar, Shillong.

Kine ki lai sngi jong ka jingiaseng ialap ki la long shisha ki por jong ka jingpynthymmai kaba ai bor bad ai mynsiem ia kiba ngeit. Ngi sakhi ia ka bor baphylla jong ka Gospel. Ka jingiaseng ka la long kaba kmen, kaba sngewtynnad bad kaba ai mynsiem ia ki nongwad ia ka jingshisha. Nga ngeit ba ki briew ki lah ban iohi ia ka jinglong synlar (simplicity) jong ka Gospel. Ki mynsiem ba kordor, ki paralok, ki para shakri, bad kiba haïing hasem na jngai bad na jan ki la wan ban ïohsngew ïa ki khubor na ka bynta kane ka por na ka Ktien U Blei.

Katto katne na ki nongwan sngap jong ngi ki la ioh jingtip na Facebook, katto katne na ka WhatsApp bad katto katne na ki pamphlets ba ngi la sam. Nga sngewkmen ba ki don ka jingshlur ban wan wat hapdeng ka jingkhim jong ka por, ka jingpang jingshitom, ki jingeh bad ki jingjynjar kiba lehse ki lah ban iakynduh kum ha kane ka por. U Blei u tip ia ka jingiashem jong ki bad u tip haduh katno ki thrang bad ki sliang ia ka hok bad ia ka jingshisha. Kim shym la wad lehnohei ia U Blei, naba u tip ban pyndap ia ka jingdonkam jong ki. Ka long ruh kaba sngewtynnat ban iakynduh markhmat bad kito kiba ngi la iakynduh lyngba ki social media bad lyngba jingphah kot. Katno jingsngewkmen ba ki parabangeit jong ngi na ki jaka bapher bapher jong ka ri khasi jaintia ki la wan ban iasoh bad iashim bynta lang bad ngi. Katto katne na ki ki la don ryngkat bad ngi baroh lai sngi bad ki la sah bad kiba haïing hasem jong ki bad don ruh napdeng jong ki kiba la sah ha homestay.

Hynriew tylli ki khubor kiba ngi la ioh ban iasam ha kine ki sngi:

Khubor 1 | Friday janmiet - Ki Dak jong ki Por bad ka rukom wan jong U Khrist - Jasper Khongwar

Khubor 2 | Saturday mynstep - Ki Jinghikai bakla shaphang Ka Jingwan Arsien - Jasper Khongwar

Khubor 3 | Saturday mynsngi - Ka Sngi bad Ka Por - Dajied Lyngdoh

Khubor 4 | Saturday janmiet - U Shakri Bymman - Dajied Lyngdoh

Khubor 5 | Sunday mynsngi - Ka Jingieit bakongsan - Jasper Khongwar

Khubor 6 | Sunday janmiet - Khie Joit Me uba Iohthiah - Dajied Lyngdoh

[Ia kine ki khubor phi lah ruh ban peit ha Youtube Channel - Christ in you Ministries. Mynta te ngim pat ioh ban pynmih. Ngin sa pyntip ia phi ynda la upload ha Youtube.]

Ka Jingrwai kyrpang na ki parabangeit na Jaintia: Phi la pynkhreh?

Jingrwai kyrpang: Oh Ka Jingkmen bah haba Jisu un wan!

Ka long ka jingiaseng kaba sngewtynnad shibun. Naduh ki khynnah haduh ki rangbah ki pynpaw ia ka jingsngewtynnad bad ia ka jingkmen jong ka jingiasyllok ha kine ki sngi. Da ki phew ngut ki briew ngi ioh ban sakhi ha kine ki lai sngi. Bun ki ong ba ki khubor kaba ki iohsngew ki iadei bha bad ka mynsiem jong ki. Kane ka jingiaseng ka la ialam ia ki briew ban iit shuh shuh ia lade bad ban wad ia ka jinglongkhuid bad ia ka jingiadei kaba jan bad U Jisu Khrist, u nongpynlong bad u nongpynjanai ia ka jingngeit jong ngi. Don kiba ong ba ka jingkmen jong ki ka dang sah ha ka dohnud jong ki haduh kine ki sngi. Bun ki kwah ia ngi ban pynlong biang kum kine ki jingiaseng man la u snem. Hooid, kata ka long thik kumba ngi kwah ban leh. Ngi ngeit skhem ba kaba kham bha shuh shuh kan sa wan. Ngi dwai bad kyrmen ba kiei kiei baroh kin long katkum ka mon U Blei bad katkum ka jingpyniaid bastad jong U.

Kane ka dei ka jingiaseng Ialap kaba nyngkong eh jong ngi ha nongbah Shillong. Ngi la ioh jinghikai shibun shaphang kiei kiei bad ngi ainguh ia U Blei na ka bynta kane ka jingiashem kaba u ai ha ngi. Ngi kyrmen da ka jingaiei U Blei ngin sa nang pynbha shuh shuh ha ki por ban wan. Ngi sngewkmen ba la ioh ban pyndep ia ka kam U Blei ha kine ki lai sngi. Ka khubor ka la hap ha ki shkor jong kiba iohsngew. Ngi ngeit skhem ba ym shym la bet lehnohei lymne trei lehnohei hynrei ba kan sei soh sha ka jingpynthymmai bad ka jingkylla-kaba-mut kaba shisha da ka jingaiei U Blei.

Ka burom ka long sha U Blei uba im bad uba shisha lyngba U Jisu Khrist, U Khun jong U. Amen.

Wan kham jan sha U Khrist, phin ym kyllon lano lano ruh. U Blei un kyrkhu ia phi.

Dajied