Mawjrong Mission Report 2023

Ka jingaiei bad ka jingsuk to kan long ha phi na U Trai jong ngi U Jisu Khrist. Mynta nga shu kwah ban iasam bad phi ia ki kam baphylla ba U Blei u la leh ha kine ki por ba la dep ha shnong Mawjrong.

Lah jan man ka taiew mynta nga poi sha iing bah Donbok sha Mawjrong ban bteng ia ki jinghikai kiba donkam ha kine ki sngi khadduh bad ki paralok jong u. Ngi ju poi bha ha ka sngi Sunday namar ka long ka sngi ha kaba baroh ki ia lait por bha. Ka jingshai ka la shai ha ki jaka badum. Ngi pynleit jingmut bha ha ki khubor ki lai angel katkum ka kitab Jingpynpaw 14 kaba ki briew baroh ki donkam ban tip shuwa ban wan U Jisu Khrist. Ia ki khubor la hikai ha ki mat bapher pher, bad khamtam ia kito ki bynta kiba iadei bad ki jingshisha na ka bynta kane ka por jong ngi (present truth).

Naduh kaba nyngkong haduh mynta baroh san hynriew iing ki long kiba minot ban wan sngap ia ka ktien U Blei. Haba ki wan ki wan baroh shi iing, bad khun bad kti naduh kiba dang khynnah haduh kiba dang buin. Ka long shisha kaba phylla haduh katno ki thrang ban tip ia ka mon jong U Blei. Haba ki sngap ia ka jinghikai ki ai kylluid ia ka por bad kim ju kyrkieh ban leit noh sha iing haba kam pat kut ka jinghikai. Ki long kiba kloi ban phla ia ka jingiashem jong ki bad U Trai. U Trai u la leh shibun ki jingphylla ha ka jingim jong ki. Ka jingiashem jong ki ka long shisha kaba sngewtynnad bad kaba ai mynsiem.

Watla ki don bun kiba kren pyrshah ia ki ha shnong ha thaw bad ha iing ha sem lajong, ki ieng skhem halor ka nongrim jong ka ktien U Blei kat kaba ki tip. U Jisu Khrist u ialam ia ki bad nga ngeit un nang iai btin lynti ruh ia ki haduh kaba kut. Ngi la don shisha ka por ba sngewtynnad man ka por ba ngi leit bad ngi la don ka jingiadei kaba jan bha katba nang mih ki sngi. Ka jingieit U Blei ka tehsong lang ia ngi kum shipara ha U Khrist.

Kat kaba ngi la iasam haduh mynta, ki sngewthuh ba ki jinghikai kaba ki la iohsngew ki long ki jingshisha kiba donkam ha kine ki sngi khadduh bad ki kwah ban tip shuh shuh. Kine ki briew ki bat ia ka Baibl, bad ha la ka sngi ki da iit bniah na ka Jingthoh Bakhuid ban tip skhem la kita kiei kiei ruh kaba ki la iohsngew ki lah long shisha kumta ne em. Ki sngewkmen eh ban tip ia ka jingshisha bakhraw ha ka jingshai kaba thymmai ba don tang uwei U Blei uba U Kpa, bad U Jisu Khrist U Khun ba la kha marwei jong U Blei. Ki la iohi ia ka jingieit jong U Blei ha ka jingshai bakhraw ha kaba kim pat ju iohi mynno mynno bad ki sngewnguh shibun ia U Kpa uba ha bneng. Ka burom long sha U Blei lyngba U Jisu Khrist.

Khyndiat shaphang bah Donbok Nongrum

Ha kawei ka sngi u bah Donbok u pan number phone jong nga ha ka comment jong kawei ka Youtube video ba nga kren shaphang uwei U Blei jong ka Baibl. Bad dei nangta kein ba ngi sa ia ithuh ithaw bad ialang paralok. Nga kynmaw ba u iathuh ia nga shaphang kumno ba U Jisu u kren ha u ha ka por ba u dang wad ia U Trai ha ka por ba jingpang ka la ban jur ia u da ki bnai haduh kum ban iap noh. Ha ka por ba u plied kotbah U Jisu u ialam ia u bah Donbok direk sha ka dkhot na Ioannis 11:4 kaba ong, "Haba U Jisu te U la ïohsngew, U la ong, “Kane ka jingpang kam long sha ka ban ïap, hynrei, na ka bynta ka burom U Blei, ba yn pyndonburom ïa U Khun U Blei da ka.” U bah Donbok u shim ia kane ka ktien kum ka sur kren jong U Trai na ka bynta jong u shimet bad u ngeit skhem naduh ka dohnud baroh ba U Trai u la jubab ia ka jingdwai jong u ha kane ka dkhot bad kumta u la ioh mynsiem bha ba kata ka jingpang jong u kan ym lah ban bat ia u namar U Trai u la ong, "kane ka jingpang kam long sha kaban iap." Bad kumta u ngeit skhem U Trai un pynkhiah bad leh kambah ia u, bad ka la long shisha kumta. Ym slem hadien katto katne por, ka jingpang ka la jah noh na u Donbok, U Jisu u la pynkhiah ia u. Iaroh i'U Trai. U Donbok u lah mat shisha ia ka bor phylla jong ka jingaiei jong U Blei mynba u la ngeit ha U Trai Jisu kum U Nongpynim bad U Nongpynkhiah jong u. Kiei kiei baroh ki la leit noh bad ha khmih kiei kiei baroh ki la jia long kiba thymmai. Na ka jinglongmraw ha ka pop bad ha ki jingkwahbrai bad ki jingdih pynbuaid, mynta da ka jingaiei U Blei u la kylla long u shakri bakmen bad balaitluid ban phla ia ka kyrteng jong U Trai Jisu Khrist kat shaba u ialam U Mynsiem U Trai. Kane ka jingjia kam pat shym la slem eh. Hynrei kaba phylla ka long ba u la ioh bor ban ialap bad pyndwai ia ki briew ha iing ha sem lajong, ha shnong ha thaw, ha sor Shillong bad kiwei kiwei ki jaka ruh, la ka long ha surok, ha iew, bad ha ki iing briew kumjuh. Kane long kaba donbor shisha. Bad shibun ruh ki la ioh jingkyrkhu lyngba ka jingphla bad jingshakri jong u. Ka jingiaroh bad ka burom long sha U Khun langbrot jong U Blei uba la kit noh ia ki pop jong ka pyrthei.

"Ha kaba wai noh, ko parabangeit, kiei kiei kiba shisha, kiei kiei kiba donburom, kiei kiei ki bahok, kiei kiei ki bakhuid, kiei kiei kiba itynnad, kiei kiei kiba dei ïaroh (good report/jingphla babha); lada don kano kano ka jingbha, bad lada don kano kano ka jingïaroh, to phin ïapyrkhat ïa kine kiei kiei ruh." Philipi 4:8