Suk kiba khuid ha ka dohnud

KI JINGKYRKHU BASHISHA – BYNTA VI – Suk kiba khuid ha ka dohnud

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba khuid ha ka dohnud

Mathaios 5:8 Suk kiba khuid ha ka dohnud: naba kin iohi ia U Blei.

Kiba khuid ha ka dohnud ki dei ki briew kiba hok ha ka mynsiem. Ki long kito kiba ieit ia ka jingshisha bad kibym sngewbha ha ka jingbymhok. Ki long kito kiba shi-sur bad kiba shi-jingmut, kiba iaid tang ha kawei ka lynti. Ki dei kito kiba don ia ka jingieit, kibym buh shun iano iano, kibym pyrkhat sniew ia kiwei, kibym leh sarong ia lade, kibym bishni, kibym wad tang ia kiei kiei ruh la ka jong. Ki long kibym arsap bad kibym lamler hynrei kiba khuid ha ka jingthmu bad kumjuh ruh ha ki kam. Lada uno uno u briew u pynpaw ia kine ki jinglong u pyni ia ka dak ba U Blei u la ai ha u ia ka dohnud kaba thymmai.

Hato u briew u don ia kane ka dohnud bakhuid na la ka jinglong tynrai? Ngam tharai ba u briew da lade un tip ia ka jubab. Te mano ba ithuh khambha ia ka dohnud jong ngi?

Salm 44:21 Hato U Blei un ym wad noh ia kata? naba u tip ia ki jingbuhrieh ka dohnud.

Jeremaiah 17:10Nga U Trai uba iit ia ka dohnud, nga tynjuh ia ki khyllai, kat ban ai ha uwei uwei baroh katba kum ki lynti jong u, katba kum u soh ki jingleh jong u.

Dei tang U Blei uba tip lut ia ka naduh haduh jong ngi. Ban ngeit ha ka ktien U Blei ka long ban shaniah ha ka jingstad babymjukut jong U Blei. Te katkum ka ktien U Blei ka dohnud kaba kumno u briew u don hashuwa ka jingkha arsien?

Jeremaiah 17:9 Ka dohnud ka kham shukor ban ia kiei kiei baroh, bad ka long kaba sniew khlem jingkyrmen: uei uba lah ban ithuh ia ka?

Hebru 3:12To sumar, ko para bangeit, ioh ba kumno re kumno kan don hano hano na phi ka dohnud basniew ka jingbymngeit, ha kaban phai dien noh na U Blei baim.

Na la ka tynrai, ka dohnud u briew ka long kaba sniew, kabym ngeit, kaba mutlop, bad kaba arsap. Ka long ka dohnud maw, kabym pyndem hynrei kaba ialeh pyrshah ia ka mon U Blei. Ka long ruh kaba kham shukor ban ia baroh. Ka sngew ba ka long kaba beit haba ka long kaba kynriang.

Ngi lah ruh ban ithuh ia ka jinglong jong ka dohnud na ka rukom im kaba paw shabar. Ki jinglong jingim ki mih naei?

Proberb 4:23 To ri khop ia la ka dohnud da kaba sumar eh; naba na ka ki wan ki jingmih ka jingim.

Loukas 6:43-45 Namar ym ju don u dieng babha uba sei ki soh bymman; lymne u dieng bymman uba sei ki soh babha. Namar ia u dieng baroh yn ithuh na u soh jong u hi; naba kim ju kheit ia ki soh dumbur na ki dieng shiah, lymne kim kheit ia u soh waiñ na ka law lynnong dieng shiah. U briew uba bha u sei ia kaba bha na ka jingkynshew kaba bha ka dohnud jong u; u briew uba bymman ruh u sei ia ka bymman na ka jingkynshew kaba bymman ka dohnud jong u: naba na ka jingshlei ka dohnud, ka shyntur jong u ka kren.

Mathaios 15:19 Naba na ka dohnud ki mih noh ki jingmut bymman, kaba pyniap, kaba klim, kaba iakai kynthei, kaba tuh, kaba sakhi lamler, kaba kren beiñ. Dei kine kiei kiei kiba pyntngit keiñ ia u briew: hynrei ban bam da ki kti khlem thet kam pyntngit ia u briew.

Kiba pyntngit pynsniew ia u briew ki dei kiei kiei kiba mih na ka dohnud babymman u briew hi. Ki jingpyrkhat, ki jingmut bad ki kam ki pynpaw ia ka jinglong jong ka dohnud. Yn ithuh ia ka jinglong jong ka dohnud na ki kam, ki jinglong bad ki ktien jong u briew.

Hynrei kaei kaba pyntngit ia ka dohnud u briew? Ka dei ka jingbymngeit bad jingbymkohnguh jong U Adam. Hadien ka pop ka dohnud u briew ka la tngit bad baroh uba wan mih sha kane ka pyrthei u la iohpateng ia kane ka jinglong tngit na U Adam. Ka Baibl ka ong, “ba ngi la bit ia ka dur ka jong uba kynja-dewmet.” (1 Korinth 15:49), “ia kaba la kha na ka jong ka doh ka long doh.” (Ioannis 3:6). Kumta ka dohnud u briew ka long kaba pyut namar la kha nyngkong ia u na “u symbai basep.” (1 Petros 1:23).

Namarkata ka jingpang jong u briew baroh ka don ha ka dohnud ym dei ha ka rukom im jong u. Ki kam basniew bad ki jingpyrkhat basniew ki dei tang ki dak bapaw jong ka jingpang barieh jong ka dohnud. Kane ka jingpang ka long kaba ma haduh katta katta namar ka dohnud ka long kaba kham shukor ban ia kiei kiei baroh, kham shukor ban ia u Soitan hi.

Mano ba lah ban ithuh ia ka? U briew hi da lade um lah ban ithuh ia ka, hynrei tang ha uba U Blei u mon ban pynpaw.

Ka dohnud ka la shukor ia kiba bun ban shaniah ha ki jingai jingmut jong ka. Ka la shukor ia baroh ban ngeit ba ka jingpang bakynja-mynsiem ka don ha ka rukom im lane ki jinglong basniew jong ki. Bad ka la shukor ia ki briew ba ki lah ban pynjem ia kata ka jingpang da kaba pyrshang ban im bha noh, ban tehlakam ia ki jingmlien basniew, ban pynshitom ia ka doh, ban leit jingiaseng, pule Baibl, ban rwai iaroh bad kiwei kiwei ki lad ki rukom. Uwei u la pan jingmut na ki riewtbit, ki lyngdoh, ki pastor ban im babha noh, u la pule ia ki kot jingsneng, bad ki kot kiba dei shaphang ka akor ka burom. Ha la ka bor baroh u la pyrshang ban pynbha ia la ka jingim tangba kam shym la ai jingjahthait bad jingsuk ha ka mynsiem. Kumno keiñ un ioh jingkhiah haba u wad dawai tang ban pynjem ia ki dak bapaw shabar? Ban pynkhuid tang shabar ka long kum u briew uba pang cancer shapoh hynrei uba kyllan dawai tang na ka snieh doh. Ban pynkhuid tang shabar ka long kum ki mot ha lum jingtep ba la pushara bha nabar hynrei hapoh dap tang da ki shyieng baiap.

Katto katne pat ki ngeit ba ka jingpang ka dei ha ki jingpyrkhat bymman bad ki la pyrshang ban tehlakam ia ki jingpyrkhat jong ki. Hynrei ki jingpyrshang baroh ki long kibym don jingmut bad kiba thala. Ka Baibl ka ong ba ki jingpyrkhat bad ki jingmut bymman kin mih na ka dohnud. Lehse ngi lah ban pynjah ia ki shipor hynrei ngin ym lah ban pynduh pyndam ia ki. Katba ka dohnud kam pat khuid ki jingpyrkhat bymman ruh kim pat lah ban khuid. Namar ba ka jingpang ka dei ha ka dohnud, ngi donkam ka dawai kaba lah ban pynkhiah ia ka.

Ka dohnud bathymmai

Hato Uta uba tip ia ka jingbuhrieh ka dohnud jong ngi u lah ban bthah ia ngi kumno ban jem noh na ka jingpang bakynja-mynsiem? Kumno ban long khuid ha ka dohnud?

Mynta ngi la sngewthuh ba ym dei da kaba pyrshang ban im ka jingim kaba bha lane da kaba sumar hukum. Ym dei da kaba leit iabeh ia ki nongiarap bakynja-pyrthei. Ym dei da kaba pynsngewsih lane shah jynit, lymne da kaba pynshitom lane pynmong ia lade.

Ym don kaei kaei ruh kaba ngi lah ban leh da lade ban pynkhuid ia ka dohnud. Sa tang ka kambah baphylla jong U Blei kaba lah ban pynlong khuid ia u briew. “Ha ki briew kata kabym lah, hynrei ym ha U Blei: naba kiei kiei baroh ki long kiba lah ha U Blei.” (Markos 10:27)

Ha ka jingsngewkut lad bad jingbym kyrmen shuh, u briew ba pait dohnud, um don jaka shuh ban phai shano shano hynrei tang sha U Trai Jisu. Ha ka jingbym sngewbit dor, un wan sha U Trai da ka jingsngewrit bad un kyrpad, “Lada me mon, me lah ban pynkhuid ia nga.” (Markos 1:40)

Salm 51:10-12 To pynlong ka dohnud kaba thymmai hapoh jong nga, Ah U Blei: bad to pynthymmai ia ka mynsiem kaba beit hapoh jong nga. Wat bred noh ia nga na khmat jong me; bad wat shim noh ia la u mynsiem bakhuid na nga. To ai pat ha nga ia ka jingkmen ka jingpynim jong me: bad to kyrshan ia nga da ka mynsiem kaba kylluid.

Ha baroh kiba pan, ka jubab jong U Nongpynim ba isynei kan long, “Nga mon; to men long khuid.” (Markos 1:41). O ka jingieit aiu kaba kum kane!

Lada ngi ngeit ngin sa pan kumba U Dabid u pan na U Blei, te yn sa ai ha ngi khlem tud.

Esekiel 36:26,27 Ngan ai ruh ka dohnud thymmai ha phi, bad ka mynsiem thymmai de ngan buh hapoh jong phi: bad ngan khlaw ia ka dohnud maw na ka doh jong phi, bad ngan ai ka dohnud doh ha phi. Bad ngan buh ia u mynsiem jong nga hapoh jong phi, bad ngan pyniaid ia phi ha ki aiñ jong nga, te phin rakhe ia ki jingbishar jong nga bad phin leh ruh ia ki.

Kumta haba uno uno ruh u pan ia kane, u la dei ban ngeit ba u la iohpdiang ia ka jubab te un sa ioh.

Markos 11:24 Namar kata nga ong ha phi, ba kiei kiei baroh kat kiba phi pan, haba phi kyrpad, to ngeit ba phi pdiang ia kita, te phin sa ioh.

Baroh ka long da ka jingaiei U Blei bad ngi donkam tang ban pdiang da ka jingngeit, ym da ki jingleh ba uno uno ruh un ioh ban sngewsarong. Ka donkam tang ka jingpynrit ia lade ha U Jisu. Ka donkam ia ngi tang ban shim na U Jisu.

Haba U Khrist u trei ia ka kam jong ka jingkha arsien hapoh jong ngi, ka dohnud kan long khuid khlem jingthohbria shuh. Bad yn ym don ktien ban batai kumno ka lah ban long. Ka long kaei kaei kaba phylla shisha shisha.

Ephesos 3:17 Ba U Khrist un shong da ka jingngeit ha ki dohnud jong phi.

Ka jingtrei kam U Khrist ha ka dohnud u briew ka long kum u thiat. Kumba u thiat u pynkylla dur ia ka jingbam baroh kawei, kumta ruh ka jingpynkhuid U Khrist ia ngi kan long nadong shadong. Kan sa khuid ha ka dohnud, nangta ha ka jingmut jingpyrkhat, nangta ha ki kam bad ha ki ktien kumjuh.

Kumba long u dieng kumta ruh un long u soh. Ki soh babha kin sa sei na ka dohnud babha haduh ka laiphew shah, ka hynriew phew shah bad ka shispah shah.

Naba kin iohi ia U Blei

Hangne bad mynta, kiba khuid ha ka dohnud ki lah ban iohi ia U Blei da ki khmat jong ka jingngeit. Ban iohi kamut ban ithuh. Khlem ka jingkah, haba ngi khmih sha U Jisu, ngin sa iohi ia U Blei kum uba donbor halor baroh, uba ieit, uba isynei, uba aiei bad uba bha ha ka jingthew kaba bymjukut.

2 Korinth 4:6Naba U Blei uba la hukum ia ka jingshai ban shai noh na kaba dum, u la pynshai ha ki dohnud jong ngi, khnang ia kaban pynshai ia ka jingtip ka burom U Blei ha ka khmat U Jisu Khrist.

U soitan u la pynmatlah ia ki briew, bad kim iohi shuh ia U Blei kumba u long, hynrei ki la iohi ia U Blei ha ka jingshai kaba lamler, ki iohi ia U Blei kum ubym ieit, u nongbishar uba eh bad uba domriang.

2 Korinth 4:4Ha kiba u blei jong kane ka pyrthei u la pynmatlah noh ia ki jingmut kita kibym ngeit, khnang ba ka jingshai ka gospel ka burom U Khrist, uba long ka dur U Blei, kan ym tyngshain ha ki.

Ka long kaba donkam ban tip ba hadien jong ka pop ym pat uno uno ruh u briew uba la iohi shai ia ka dur met jong U Blei.

1 Timothi 6:16Uba tang ma u hi uba don ka jingbymiap, uba shong ha ka jingshai bymlah kut: ia uba ym don briew uba la iohi, lane ba lah ban iohi: ha uba to long ka burom bad ka bor bah bymjukut: Amen.

Wat hadien ka jingsiewspah jong U Khrist ia uba pop, U Blei bastad u la ibit ban khang lad shuwa mynta ia u briew ban iohi ia ka dur khmat jong U lymne ia ka dur jong U Khrist, haduh ka jingwan arsien U Jisu Khrist.

Ynda U Khrist un wan ha ka bor bad ka burom bakhraw, khlem da kah shuh lane buhrieh ia la ka burom, ki bymman kin phetrieh sha ki krem bad hapdeng ki mawsiang jong ki lum bah bad kin buhrieh ia lade na “ka khmat uta uba shong halor kata ka khet.” uba la iap ban siewspah ia ki. (Jingpynpaw 6:16).

Kibym khuid ha ka dohnud kim lah shah ban khmih ia U Blei. Ia ka pop “U Blei jong ngi u long ka ding kaba bam duh noh.” (Hebru 12:29). Lada ngi dang pyniasoh ia lade bad ka pop, ngin iap lada ngi khmih sha U Blei, hynrei lada ngi pyniasoh noh ia lade bad U Khrist, ngin long khuid na ka pop bad ngin sa lah ban iohi ia U Blei. Ha ka jingwan arsien U Trai Jisu, ngin sa shad kmen haba ngin iohi ia ka burom jong U.

1 Korinth 13:12 Namar mynta ngi iohi tang kumba ha ka iit babyrngut ha kaba dum byrngut byrnget; hynrei hangta markhmat markhmat: mynta nga tip tang katto katne, hynrei hangta ngan ithuh biang, kumjuh kumba la ithuh biang ruh ia nga.

1 Ioannis 3:2 Ko hep baieit, mynta ngi long ki khun U Blei, bad ym pat la pynpaw ia kaei ba ngin sa long: hynrei ngi tip ba, ynda la pynpaw ia u, ngin long kiba kum ma u: naba ngin iohi ia u kumba u long hi.

Hynrei watla ia ka burom bapaw jong U Blei yn sa pynpaw ha ka jingwan arsien U Jisu Khrist, mynta ha kane ka jingim da ka jingaiei U Khrist ngi la lah ban khmih ia ka burom bakynja-mynsiem jong U Blei ha U Khrist Jisu.

Shu pyrkhat phi kumno kan long kane ka jingiakynduh markhmat bad U Blei. Ka lad bakhraw aiu kaba kum kane!

Jingpynpaw 22:3Bad nga la iohsngew ka ktien bajam na kata ka khet, ka da ong, Ha khmih, ka tabernakl U Blei ryngkat bad ki briew, bad un shong lem bad ki, te ma ki kin ialong ki paidlang jong u, bad U Blei hi un long lem bad ki, bad un long U Blei jong ki.

Ynda poi ha bneng phyrnai, ngin sa iohi ia ka dur khmat U Kpa baieit, bad ngin sa long noh lem bad U shaduh ki bymjukut ki bymjukut. To wan kloi Trai Jisu baieit, to wan kloi. Amen.