Suk kiba pyniasuk

KI JINGKYRKHU BASHISHA – BYNTA VII – Suk kiba pyniasuk

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba pyniasuk

Mathaios 5:9 Suk kiba pyniasuk: naba yn khot ia ki ki khun U Blei.

Haba ong pyniasuk, ngi ju pyrkhat lehse ba ka dei tang ban shu leit pyniasuk ia kiwei ki briew kiba don hapdeng ka jingiakajia lane ka jingiakynad, lane ka jingiashoh ka jingiadat. Lehse ngi la ju pyrkhat ba U Jisu u mut ban ong tang katne. Hynrei hato kine ki ktien U Jisu ki long kiba sting haduh katta? Ym kumta, em. Wat kiba arsap ruh ki lah ban pyniasuk ha kane ka rukom, haba ki hikai ia kiwei hynrei ia lade kim leh. Ki briew hi ha la ka jinglong tynrai ki long kiba sniew bad kiba shun bieit, “ki kjat jong ki ki long kiba stet ia kaban pynmih noh ia ka snam; ka jingpynjot bad ka jinglanot ki long ha ki lynti jong ki; bad ia ka lynti ka jingpynsuk kim shym la ithuh; ym don ka jingsheptieng ia U Blei ha pyrshah ki khmat jong ki.” (Rom 3:15-18).

Haba ong pyniasuk, nyngkong eh, kamut ban pyniasuk ia lade bad kiwei. Ka Baibl ka ong, “To beh brai ia ka jinglong suk bad ki briew baroh, bad ia ka jingpynkhuid, khlem kata uno uno ruh un ym iohi ia U Trai.” (Hebru 12:14). Hato kine ki ktien ki long kiba sting? Kibym treh ban iasuk bad ki parabriew, kin ym lah ban iohi ia U Trai ha ka jingim kaban sa wan. “Naba kumta te, ia, ngin iabeh brai ia kita kiei kiei ruh ki jong kata ka jingiasuk, bad ia kita kiei kiei ruh da kiba ngin iatei paralok hi.” (Rom 14:19).

Hooid, ngim dei ban sngewthuh bakla noh haba ong iasuk, naba ka ktien U Blei ka khlem pynshlur ia ngi ban iasuk bad ka jingbakla, ka jinglamler, ka jingmane bleithaw, lymne bad kaei kaei kaba long pyrshah ia ka mon U Blei. Hynrei ka ktien U Blei ka hikai ia ngi ba ngi dei ban iasuk bad ki briew watla ngim iamynjur lane iaid lang bad ki ha kajuh ka jingngeit.

Ban iasuk bad kiwei kamut ban ieit ia ki kumba ki long. Kamut ban pyrkhat bha ia kiwei, lehbha ia ki, bad ban kren bha ia ki. Kamut ban long kiba kloi ban map bad iasuk bad ki briew kiba leh sniew ia ngi. Naba khlem ka mynsiem jong ka jingmap ngin ym lah ban iasuk badno badno.

Ban iasuk bad kiwei kamut ban nym pyrkhat sniew iano iano, lane leh sniew iano iano, lane kren sniew iano iano. Ki khun jong U Blei kim dei ban ai jaka ia ka jingbitar shla, ka jingkhihwin, ka jingiania, ka jingiapait, bad ka jingiapyneh ha ka dohnud jong ki.

2 Timothi 2:22,23 Hynrei to phet iap noh na ki jingkwah brai ka jinglong samla: bad to beh brai ia ka hok, ia ka jingngeit, ia ka jingieit, ia ka jingsuk, lem bad kita kiba khot kyrpad ia U Trai na ka dohnud bakhuid. Hynrei ia kita ki jingiasaid babieit bad ba pathar to kyntait noh, haba tip ba ki iapynmih ki jingiania. Te kam dei kein ia u shakri U Trai ban iania; hynrei ban long uba jemnud ia ki briew baroh, uba nang hikai, uba shah jem, ha ka jingjemnud uba sneng ia kita kiba ialeh pyrshah; ba lehse U Blei un ai ha ki ka jingkylla kaba mut ia kaban ithuh ia ka jingshisha: bad ba kin pyllait ia lade na ka jingriam u Soitan.

Kumno ngin pyniasuk bad ki briew?

Ka don tang kawei ka lynti jong ka jingiasuk. Ngi dei ban iasuk bad kiwei kumba U Blei u pyniasuk ia lade bad ngi. Kumno U Blei u pyniasuk bad ngi? U Blei u pynpaw ia ka jingieit jong U, mynba ngi dang long kiba pop bad kiba shun ia U. Ka Baibl ka ong, “Hynrei U Blei u pyni shynna ia la ka jong ka jingieit sha ngi, ha kaba haba ngi dang long kiba pop, U Khrist u la iap iapli ia ngi. Namar lada, mynba ngi la long ki nongshun, la pyniasuk noh ia ngi bad U Blei da ka jingiap U Khun jong u, te khamtam shibun, haba la pyniasuk ia ngi, yn pynim ia ngi da ka jingim jong u.” (Rom 5:8,10).

U Blei u pyniasuk bad ngi da lade hi. “Te kiei kiei baroh ki long na U Blei, uba la pyniasuk noh ia ngi ha lade hi da U Jisu Khrist, bad uba la aiti ha ngi ia ka jingpyntrei ia ka jingpyniasuk; kata ka long, ba U Blei u dang pyniasuk ia ka pyrthei ha lade hi ha U Khrist, khlem da niew ha ki ia ki jingpalat jong ki; bad ba u la buhti ha ngi ia ka ktien kane ka jingpyniasuk.” (2 Korinth 5:18,19). U la iasuk shuwa ma U, bad um ap ia ngi, namar U tip ba ngim lah da lade hi. U Blei u khlem peit ia ka jinglong bymbitdor jong ngi, U iasuk bad ngi namar U sngewbha ha ka jingisynei bad ka jingaiei.

Kumjuh ruh, ynda u briew u la pdiang ia U Mynsiem U Blei, ka jinglong U Blei kan paw ha u bad un iasuk bad kiwei kumba U Blei u la iasuk bad u. U Jisu u ong, “To ieit ia ki nongshun jong phi; to leh bha ia kita kiba bishni ia phi; kyrkhu ia kita kiba tim ia phi; duwai ruh na ka bynta kita kiba leh sniew ia phi. Ha uta uba thab ia me ha kawei ka ngab, to pynshah sa kata kawei ruh: bad ha uta uba shim noh ia ka jainkup jong me, wat khang ia ka sopti ruh. To ai ruh ha u briew baroh uba iapan na me: bad na uta uba shim noh ia kiei kiei ruh ki jong me, wat pan pat ia ki.

Naba lada phi ieit tang ia kita kiba ieit ia phi, ka jingnguh aiu ka dei ia phi? Haba kiba pop ruh ki ieit ia kita kiba ieit ia ki. Lada phi leh bha ruh tang ia kita kiba leh bha ia phi, ka jingnguh aiu ka dei ia phi? naba kiba pop ruh ki leh hi kumjuh.

Hynrei to ieit ia ki nongshun jong phi, to leh bha ruh, bad to ai kylliang, khlem da duh jingkyrmen satia: te ka nong jong phi kan long kaba khraw, bad phin long ki khun U Bahakhlieh tam eh: naba u long uba sbun ia ki bymnguh bad ia ki bymman.” (Loukas 6:27-30, 32, 33, 35).

Watla ki paramarjan kim long bitdor makna, lane kim dei hok ban ioh ruh, ai ha ki ia ka jingieit jong phi kumba leh U Blei ia phi. Balei ngin ap ia kiwei haba ngi tip ba kin ym lah ban iasuk bad ngi da lei lei ruh? Lada U Khristan un iasuk bad kiba ialeh pyrshah, ki nongialeh pyrshah kin sa iohi ia ka bor jong ka gospel ha ka jingim jong u. Bad “lehse U Blei un ai ha ki ka jingkylla kaba mut ia kaban ithuh ia ka jingshisha; bad ba kin pyllait ia lade na ka jingriam u Soitan.” (2 Timothi 2:25-26).

Proberb 16:7 Haba ki lynti u briew ki pynsngewbha ia U Trai, u pynlong wat ia ki nongshun jong u ba kin iasuk bad u.

Rom 12:14-21 To kyrkhu ia kita kiba leh bein ia phi: to phin kyrkhu kein, bad wat tim phi. To iakmen lem bad kita kiba iakmen, to iaiam lem bad kita kiba iam. To long kiba iamut ia kajuh paralok hi: to wat iaimut brai ia kiei kiei ruh ki jinglong meng, hynrei to pynryngkat ia lade bad kiba rit. Wat long phi kiba tharai stad ia lade hi. Wat leh markylliang hano hano ruh ia kaba sniew namar kaba sniew; to pyrkhat lypa ia kiei kiei ruh kiba bha tynnad ha khmat ki briew baroh; lada long kaba lah, katba shong kata ha phi to long kiba iashong suk noh bad ki briew baroh. Wat long ma phi hi kiba pynhiar kput, ko ki hep, hynrei phin ai jaka ia ka jingbitar U Blei namar la thoh: Ka jingpynhiar kput ka long ka jong nga hi, ngan leh kylliang ma nga, ong U Trai. Hynrei lada u nongshun jong me u thngan, men bsa ia u, lada u sliang, men ai dih ia u: namar da kaba leh kumta men kynton ia ki rnga ding barhem halor ka khlieh jong u. Wat ai ba yn jop noh ia me da ka jong kaba sniew, hynrei to jop noh ma me ia kaba sniew da kaba bha.

Hynrei shuwa ban lah ban iasuk bad ki briew baroh ka donkam nyngkong eh ia ngi ban iasuk bad U Blei. Ngin ym lah ban iasuk bad ki briew lada ngim pat iasuk bad U Blei.

Kumno ngin iasuk bad U Blei?

U Blei u la dep pynlong ka jingiasuk bad ngi. U Jisu u la aiti ia la ka jingim ha Kalbari ban pynphai pat ia ki dohnud jong ngi sha U Blei. Hato ngi la leh ia ka bynta jong ngi pat? U Blei um pynbor iano iano ruh, u ieh sa ha ngi ia “ka jingpyntrei ka jingpyniasuk” bad U ap ia ngi ban iasuk bad U.

U Blei u kyrpad ia phi, “To long phi ia kiba la pyniasuk bad U Blei.” (2 Korinth 5:20). Kumno pat ngin iasuk bad U Blei?

Rom 5:1 Namarkata, ba la pynksan ia ngi da ka jingngeit, ngi don ka jingiasuk bad U Blei da U Trai jong ngi U Jisu Khrist.

U nongpop u iasuk bad U Blei da kaba ngeit bad aiti ia ka jingim ha U Jisu Khrist. Ban mad ia ka jingiasuk bad U Blei uwei u hap ban ngeit bad pdiang ia ka jingmap-ei U Blei. Ban ngeit ha U Jisu bad ban phla ia ki pop ka dei ka jingpyntreikam jong ka mon. Ngi hap ban jied, ban pdiang lane ban kyntait. Kane ka shong ha ngi.

Shu pdiang ia kaei kaba U Blei u la leh lyngba U Jisu. Shu pdiang ia U Jisu kum U Nongpynim bad nongsiewspah jong phi, kumta phin sa shem ka jingsuk bad ka jingkmen bym lah ong shuh.

Ka jingsuk ka long u soh jong U Mynsiem (Galatia 5:22). Kumta ka dei tang haduh ba ngi pdiang ia U Mynsiem jong U Khrist ba ngin sa lah ban iaid ha ka jingsuk bad ka jingjai-jai. U Jisu u ong, “Ia ka jingsuk nga iehnoh ha phi, ia ka jingsuk ka jong nga nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng.” (Ioannis 14:27).

Ka dak jong ka jinglongkhun

“Suk kiba pyniasuk: naba yn khot ia ki ki khun U Blei.”

Lada ka mynsiem jong ka jingieit ka paw ha uno uno u briew ka pyni ba u long u khun jong U Blei. Ka pyni ba ia u la kha na U Blei. U Ioannis u ong, “Ko hep baieit, to ngin iaieit paralok hi, naba ka jingieit ka long na U Blei; te uwei pa uwei baroh uba ieit, la kha ia u na U Blei, bad u ithuh ia U Blei.” (1 Ioannis 4:7). “Ha kane kein ki la paw kita ki khun U Blei, bad kita ki khun u Soitan. Uwei pa uwei baroh ubym ju leh ia ka hok um long na U Blei, lymne uta ubym ieit ia la u para.” (1 Ioannis 3:10) .

Lada ngim ieit ia ki parabriew ka pyni ba ngim ieit ia U Blei. Namar lada ngi ieit ia U Blei kan pynlong ia ngi ban ieit ia ki parabriew ruh. Ngim lah ban don ia ka jingieit U Blei katba ngi dang snoh ha ka jinglong kaba rim, ban bitar bad shun ia kiwei. “Lada uno uno ruh u ong, Nga ieit ia U Blei, bad u shun ia la u para bangeit, u long uba lamler; namar uta ubym ieit ia la u para bangeit ia uba u la iohi, um lah ban ieit ia U Blei ia uba um shym la iohi. Te ia kane ka hukum ngi ioh na u (U Jisu), ba jar uba ieit ia U Blei un da ieit ia la u para bangeit ruh.” (1 Ioannis 4:20,21).