Suk kiba sngewsih

KI JINGKYRKHU BASHISHA – BYNTA II – Suk kiba sngewsih

Ka jingaiei bad ka jingsuk to kan long ha phi na U Trai jong ngi U Jisu Khrist. Ka bynta jong kane ka jingpule ka la long na ka jingiathuhkhana jong U Jisu halor u lum ka jingkyrkhu. Ki long ki jinghikai kiba shem mynsiem bad kiba iadei bad ka jingsuk bad jingkyrmen jong u khun bynriew ba la hap ha ka pop.

KA JINGIATHUHKHANA HALOR U LUM

[Phi lah ban shem ha Mathaios 5,6,7 bad Loukas 6:20-49.]

Suk kiba sngewsih

Mathaios 5:4 Suk kiba sngewsih: naba yn pyntngen ia ki.

Haba ong sngewsih, kam thew eh sha kata ka jingsngewsih namar ki jingleh bakla jong ngi hi. Kam dei ka jingsngewsih ia ki jingjia kiba sniew, ki jingkyrduh kam duh jam. Kam dei ka jingsngewsih ia ki jingrem bad jingduna lajong. Kam dei ka jingsngewsih ia ka jingbymbit bymbiang jong ngi. Kam dei ka jingsngewsih jong kane ka pyrthei.

Hynrei ka dei ka jingsngewsih kaba riewblei kaba U Blei hi u ai. Ka dei ka jingsngewsih namar ki pop ba ngi la leh ia U Blei. Ngi hi ngi ieit ia ka pop na la ka jinglong tynrai, ngi donkam ia ka jingiarap na U Blei ba ngin lah ban isih ia ka pop da ka jingisih kaba janai.

2 Korinth 7:9-10 Mynta nga kmen keiñ, ym da lei lei naba la shu pynsngewsih ia phi, hynrei naba la pynsngewsih ia phi ia kaban kylla kaba mut; namar la pynsngewsih riewblei ia phi, ba kumta phin ym shah duh ha kaei kaei ruh da ngi. Namar kata ka jingsngewsih bariewblei ka pynlong ka jingkylla kaba mut sha ka jingpynim kabym babe shuh; hynrei ka jingsngewsih ka jong ka pyrthei ka pynlong ka jingiap.

Don ar jait ki jingsngewsih – ka jingsngewsih bariewblei bad ka jingsngewsih jong ka pyrthei. Kawei ka dei kaba shisha bad kawei pat kaba shukor. Kawei kaba ialam sha ka jingkylla-kaba-mut bad kawei pat sha ka jingsngewshngain ha ka jinglong barim. Kawei kaba ialam sha ka jingpynim bad kawei pat sha ka jingiap.

(i) Ka jingsngewsih jong ka pyrthei – ka dei ka jingsngewsih ia ki jingmih jong ka pop hynrei ym dei ia ka pop. Ka long kum ka jingsngewsih jong U Pharoah, U Iso bad U Judas. Ki sngewsih bad ki iam namar ki la duh noh ia ki jingmyntoi bad ia ki jingkyrkhu hynrei kim shym la shem jaka ia ka jingkylla-kaba-mut.

Hebru 12:15-17 Da kaba khmih bniah ioh don uno uno u briew uban ym kot sha ka jingaiei U Blei; ioh ba uno uno ruh u thied ka jingkthang uba da mih shluin un pynkhuslai ia phi, bad da uta yn ioh pyntngit ia kiba bun: ioh ba don uno uno ruh uba klim lane uba leh beiñ niam, kum U Iso, uba namar kaba shisien bam jingbam u la die noh ia ka jinglong hynmen jong u hi. Namar phi tip ba hadien kata, wat haba u la kwah ruh ban ioh ia kata ka jingkyrkhu, la kyntait noh ia u; namar um shym shem jaka ia ka jingkylla kaba mut, la u la wad eh ia ka da ki jingjawummat

Mathaios 27:3-5 Mynba kumta U Judas, uba la die noh ia u, haba u la iohi ba ki la pynrem ia u, u la kylla kaba mut, bad u la wallam pat ia kita ki laiphew ki sbai ha ki rangbah lyngdoh bad ha ki tymmen basan, u da ong, Nga la leh pop haba nga la die noh ia ka snam balui lui. Ki te ki la ong, Kato ka dei aiu ia ngi? khmih hi ma me keiñ. Haba u la bred noh te ia kita ki sbai ha ka iing U Blei, u la leit noh bad u la leit sdien ia lade.

Haba ong ba U Judas u la kylla-kaba-mut kamut u la sngewsih ia ki jingmih jong ka pop, bad u sheptieng ia kata ka jingbishar kaba ap ia u, hynrei u khlem kylla-kaba-mut shisha, u khlem don shisha kata ka jingsngewsih bariewblei ba u la die noh ia ka snam ba lui lui.

Ka jingsngewsih kam mut ka jingpyndem, lymda ki pyniasoh lang ia ka bad ka jingthrang ban kylla, kan ym don jingmut ei-ei than. Khlem ka jingthrang ban kylla, ka jingsngewsih ia ka pop ka long kaba suda. Khlem ka jingthrang ban kylla, ka jingsngewsih ia ka pop ka long tang ka jingda rapjot. Namarkata tangka jingsngewsih ia ka pop kamlah ban ia ryngkat bad ka jingkylla-kaba-mut.

U Trai um sngewtynnad ban iohsngew haduh katno phi sngewsih. Hynrei U Trai u sngewtynnad ban iohsngew ia kane: ba phin leh aiu ia kata ka jingsngewsih. Ka dei kane kaba U Blei u kwah ban tip bad iohsngew na phi. Ka dei kane kaba U Blei u ap na phi. Hooid! Ngi dei ban sngewsih haba ngi pynmong ia kiwei, khamtam lada ngi pynmong ia U Trai Uba U Blei jong ngi. Hynrei tang ka jingsngewsih kam pat biang. Ngi donkam ban poi haduh uta u pud ba ngi dei ban sangeh noh ban pynmong ia U Blei bad ia kiwei de. Namarkata ka Jingkylla-kaba-mut ka kynthup ia ka jingsngewsih ia ka pop bad ka jingphai noh na ka.

(ii) Ka jingsngewsih bariewblei – ka dei ka jingsngewsih bashisha ia ka pop ym dei eh ia ki jingmih namar ka pop.

Jakob 4:8-10 To wan hajan ia U Blei, te un wan hajan ia phi. To thet noh ia la ki kti, ko phi kiba pop, bad to pynkhuid noh ia la ki dohnud, ko phi kiba synrop mynsiem. To phin sngew lanot khop bad to phin sngewsih, bad to phin iam; to ai ba yn pynkylla noh ia kata ka jingrkhie jong phi sha ka jingiam, bad ia kata ka jingkmen jong phi sha ka jingsngewsih. To phin pynrit ia lade ha khmat U Trai, te un pynkhraw ia phi.

Ka jingsngewsih U Dabid ka pynpaw ia ka jingsngewsih bashisha ia ka pop. U pdiang ia ki jingduna bad jingbakla lajong.

Salm 31:9-12 To isynei ia nga, Ah Trai, haba nga don ha ka jingshipa: ka khmat jong nga ka duh noh namar ka jingsngewsih, bad ka mynsiem bad ka met jong nga. Namar ia ka jingim jong nga la pynlut da ka jingkhuslai, bad ia ki snem jong nga da ka jingud: ka bor jong nga ka duh noh namar ka jinglehsniew jong nga, bad ki shyieng jong nga ki rew noh. Namar ki nongialeh pyrshah jong nga baroh nga la jia long ka jingibeiñ, wat ia la ki paramarjan ruh shibun eh, bad ka jingsheptieng ia la kiba ithuh ithaw: kita kiba la iohi ia nga shabar ki la phet noh na nga. La klet noh ia nga kum u briew uba iap ia ubym kynmaw shuh: nga long kum u khiew ba la pait.

Naba yn pyntngen ia ki

Salm 51:17 Ki jingkñia ki jong U Blei ki long ka mynsiem kaba lwet: ka dohnud kaba lwet bad basngewsih, Ah U Blei, men ym ibeiñ.

Dei tang ia kiba pait dohnud shisha bad kiba rangli ba U Blei un pyntngen bad sop spain. Dei tang ia ka jingiam namar ka jingbym kyrmen bad ka jinglanot ba U Blei un jubab.

Salm 34:18 U Trai u long hajan kita kiba la pait dohnud, bad u pynim ia kat kiba sngewsih ka mynsiem.

Isaiah 57:15 Naba kumne ong uta uba ha khlieh bad hajrong tam uba shong dap ia ka bymjukut, uba ka kyrteng jong u U Bakhuid: Nga shong ha ka jaka kaba hajrong bad kaba khuid, bad kata ka mynsiem ruh kaba sngewsih bad basngewrit, ban pynim ruh ia ka mynsiem jong uba sngewrit, ban pynim ruh ia ka dohnud jong kiba sngewsih.

Salm 147:3 U shna ia kiba la pait dohnud, bad u spain ia ki jingmong jong ki.

Dwai sha U Blei

Lada phi shem ba ka dohnud jong phi ka long kaba eh, lada phi shem ba phim lah ban isih ia ka pop, khot ia U Blei ban pynpait pynpra ia ka dohnud maw jong phi bad ban ai ha phi da ka dohnud doh.

Bad ynda haba phi la mad shisha ia ka jingsngewsih bariewblei, kyrpad ia U Blei ban pynkylla ia ka jingsngewsih jong phi sha ka jingkmen. To pan, te yn sa ai ha phi.

Ioannis 16:23,24 (U Jisu u ong) Shisha, shisha nga ong ha phi, ba kiei kiei ruh katba phin pan na uta U Kpa ha ka kyrteng jong nga, un ai ha phi. Haduh mynta phim pat ju pan ei ei ruh em ha ka kyrteng jong nga; to pan, te phin sa ioh diang, ba kata ka jingkmen jong phi kan ioh long kaba dap.

Salm 38:1-22 (Ka jingduwai u briew ha ka jingjynjar)-

Ah Trai, wat sneng ia nga ha la ka jingbitar; lymne wat pynshitom ia nga ha ka jingotshla jong me.

Naba ki khnam jong me ki sahkut ha nga, bad ka kti jong me ka ban khia ha nga.

Ym don ka jingkoit ha ka doh jong nga namar ka jingbitar ba iaibat jong me; lymne ka jingkhiah ha ki shyieng jong nga namar ka pop jong nga.

Namar ki jingbymhok jong nga ki tyllep ia ka khlieh jong nga: kum ka jingkit bakhia ki khia than ia nga.

Ki jingmong jong nga ki iwkhong bad ki pyut, namar ka jingbieit jong nga.

La pyndor bad la pyndem shibun ia nga: nga shu leit ia iam baroh shisngi.

Namar ka syngkai jong nga ka dap da kaba sat syllang; bad ym don ka jingkoit ha ka doh jong nga.

Nga la tlot eh bad la pynlwet sat ia nga: nga la kyrhuh namar ka jingkhih ka dohnud jong nga.

Ko Trai, ka jingkwah jong nga baroh ka don ha khmat jong me; bad ia ka jingud jong nga ym shym buhrieh na me.

Ka dohnud jong nga ka tied, ka bor jong nga ka duh noh na nga: wat ka jingshai ki khmat jong nga, ka ruh ka la jah noh na nga...

Naba ha me, Ah Trai, nga kyrmen: me men phai ktien, Ah Trai U Blei jong nga...

Naba nga uba shait dkoh, bad ka jingsngewsih jong nga ka ha khmat jong nga ha la ka sngi.

Naba ngan phla ia la ka jingbymhok; bad ngan sngewsih namar la ka pop...

Wat iehnoh ia nga, Ah Trai: Ah U Blei jong nga, wat long jngai na nga.

To pynkloi ban iarap ia nga, Ah Trai ka jingpynim jong nga.

Pan na U Blei ban ai ha phi ka dohnud kaba thymmai. Kum U Dabid ngi dei ban thrang ym tang ia ka jingiohmap ia ki pop hynrei ka jingsait khuid ia ka dohnud.

Salm 51:1-14 (Ka jingkylla-kaba-mut kaba shisha)-

To isynei ïa nga, Ah U Blei, katba kum ka jingleh isynei jong me; katba kum ka jingkynrei ki jingisynei bajem jong me to pyndam noh ïa ki jingpalat jong nga. To sait khuid ïa nga na ki jingleh bymhok jong nga, bad to pynkhuid ïa nga na ka pop jong nga.

Naba nga phla ïa la ki jingpalat; bad ka pop jong nga ka don ha khmat jong nga ha la ka sngi…

To pynkhuid ïa nga da ka hyssop, te ngan long khuid: to sait ïa nga, te ngan kham lieh ban ïa ka ior.

To pynlong ba ngan iohsngew ia ka jingkmen bad ka jingsngewbha; ba kita ki shyieng kiba me la pynkheiñ kin ioh shad kmen...

To pynlong ka dohnud thymmai hapoh jong nga, Ah U Blei; bad to pynthymmai ïa ka mynsiem kaba beit hapoh jong nga.

Wat bret noh ïa nga na khmat jong me; bad wat shim noh ïa U Mynsiem Bakhuid na nga.

To ai pat ha nga ïa ka jingkmen ka jingpynim jong me; bad to kyrshan ïa nga da ka mynsiem kaba kylluid…

To pyllait ïa nga na ka jingbit snam, Ah U Blei, me U Blei ka jingpynim jong nga; te u thylliej jong nga un rwai jam shaphang ka hok jong me.

Ka jubab na U Blei kan long:

Esekiel 36:26 Ngan ai ruh ka dohnud thymmai ha phi, bad ka mynsiem thymmai de ngan buh hapoh jong phi: bad ngan khlaw ia ka dohnud maw na ka doh jong phi, bad ngan ai ka dohnud doh ha phi.

U Khun jong U Blei un wan ha ngi kum U Nongpyntngen jong ngi.

Ioannis 16:20 (U Jisu u ong) Shisha, shisha nga ong ha phi, phi phin iam bad phin lynñiar ruh, hynrei ka pyrthei kan kmen; ma phi te phin sngewsih hynrei kata ka jingsngewsih jong phi kan kylla sha ka jingkmen.

Na ka bynta kiba ngeit

a) Ka jingsngewsih jong kiba ngeit – Ka jingtynjuh

1 Petros 1:6-7 Ha kaba phi iasngewkmen eh, la mynta khyndiat por, lada donkam, la pynsngewsih ia phi ruh ha kiba bun jaid ki jingtynjuh: khnang ba kata kaba phrang ia ka jingngeit jong phi, kaba kham kordor ia ka ksiar kaba jot noh, la la phrang ruh ia ka da ka ding, yn ioh shem ia ka ha ka jingiaroh bad ka burom bad ka jinglong burom, ha ka jingpynpaw U Jisu Khrist.

2 Korinth 4:7-9 Hynrei ngi don kane ka jingkynshew ha ki khiew khyndew, ba ka jingkhraw tam eh kata ka bor kan long na U Blei, bad ym na ngi. Ha kiei kiei baroh la pynjynjar sat ia ngi, hynrei ym shym la pynshipa ia ngi; la tap baiong ia ngi, hynrei ym ha ban da kut lad; la beh beiñ ia ngi, hynrei ym shym la iehnoh noh ia ngi; la pynkyllon kram ia ngi, hynrei ym shym la pynjot noh ia ngi.

Ki Kam Ki Apostol 14:22 Bad ba ka dei ia ngi ban bsut shapoh ka hima U Blei lyngba shibun ki jynjar.

Ka jingiap jong kiba ieit, ka jingjynjar, ka jingshah leh beiñ, ka jingduna bad jingkyrduh, ka jingbym sngewthuh lut ki long kiei kiei kiba ngin hap ban iakynduh shipor.

b) Ka jingpyntngen ia kiba ngeit – Ka jingwan arsien

1 Thessaloni 4:16-18Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei: bad kita kiba iap ha U Khrist kin iamihpat shuwa. Ynda kumta ma ngi kiba dang im, ia kiba la pynsah, yn rong noh ia ngi lem bad ki ha ki lyoh, ia kaban iashem ia U Trai ha ka suiñ bneng: te kumta ngin iailong junom junom lem bad U Trai. Naba kumta to phin iapyntngen paralok da kine ki ktien.

Jakob 5:7,8 Namar kata to shah slem, ko para bangeit, haduh kata ka jingwan U Trai. Ha khmih, uba rep u ap khmih ia u soh bakor jong ka khyndew, u da iai ap slem ia u, tadynda u la ioh pdiang ia u slap bashuwa bad bakhadduh. To iashah slem ruh ma phi, to pyneh skhem ia ki dohnud jong phi, naba kata ka jingwan U Trai ka la jan.

Mathaios 28:20 Ha khmih ruh nga nga long ryngkat bad phi ha la ka sngi, haduh kaba wai noh ka pyrthei.

U Nongpyntngen (U Jisu Khrist) un iaisah bad ngi ban iarap bad ban ai mynsiem ia ngi haduh ka ka jingwan arsien jong U.

2 Korinth 1:3-4 Long ba la kyrkhu ia U Blei bad ia U Kpa U Jisu Khrist uba U Trai jong ngi, U Kpa ki jingsynei bad U Blei ka jingpyntngen baroh, uba pyntngen ia ngi ha ka jingjynjar jong ngi baroh, khnang ia kaban ai bor ia ngi ban pyntngen ia kita kiba ha kano kano ka jingjynjar da kata ka jingpyntngen da kaba la pyntngen ia ngi hi da U Blei.